13

O`zbekiston Prezidenti Vengriya delegasiyasini qabul qildi

Siyosat 18.02.2020, 16:30
548
O`zbekiston Prezidenti Vengriya delegasiyasini qabul qildi

18 fevral kuni O`zbekiston Respublikasi Prezidenti Shavkat Mirziyoev hukumatlararo qo`shma komissiyaning navbatdagi yig`ilishini o`tkazish uchun amaliy tashrif bilan mamlakatimizda bo`lib turgan Vengriya tashqi iqtisodiy aloqalar va tashqi ishlar vaziri Peter Siyyarto boshchiligidagi delegasiyani qabul qildi.

Davlatimiz rahbari O`zbekiston va Vengriya o`rtasidagi an`anaviy do`stlik va ko`p qirrali sheriklik munosabatlari oxirgi yillarda izchil rivojlanib borayotganini katta mamnuniyat bilan qayd etdi.

Turli darajada samarali muloqotlar yo`lga qo`yildi. Mamlakatlarimiz o`rtasidagi tovar ayirboshlash hajmi o`tgan yil yakunlariga ko`ra 45 foizga ortdi. Qishloq xo`jaligi, oziq-ovqat sanoati, farmasevtika va boshqa tarmoqlarda qo`shma loyihalar amalga oshirilmoqda. Ta`lim, madaniyat va turizm sohasidagi almashinuvlar kengaymoqda.

Peter Siyyarto samimiy qabul uchun O`zbekiston Prezidenti Shavkat Mirziyoevga minnatdorlik bildirib, Vengriya Bosh vaziri Viktor Orbanning eng ezgu tilaklarini etkazdi.

Uchrashuvda ikki tomonlama hamkorlik va mintaqaviy, jumladan, Evropa Ittifoqi bilan muloqot formatidagi sheriklikning dolzarb masalalari yuzasidan fikr almashildi.

Vengriyaning etakchi kompaniyalari ilg`or tajribasi va zamonaviy texnologiyalarini joriy etgan holda qo`shma investisiya loyihalarini amalga oshirish hamda ularni moliyalashtirishga alohida e`tibor qaratildi.

Hududlararo aloqalarni rivojlantirish, bank, transport sohalariga oid dastularni amalga oshirish, yuqori malakali mutaxassislar tayyorlash istiqbollari muhokama qilindi.

Bo`lajak oliy darajadagi uchrashuvlar rejasi ham ko`rib chiqildi.

Шарҳлар