my5

Turkiyaga tashrifning so`ngi kuni: muhtasham marosim, tarixga muhrlangan lahzalar (foto)

Siyosat 21.02.2020, 08:59
1159
Turkiyaga tashrifning so`ngi kuni: muhtasham marosim, tarixga muhrlangan lahzalar (foto)

O`zbekiston Respublikasi Prezidenti Shavkat Mirziyoev 20 fevral kuni Anqara shahrida Turkiya Respublikasi Prezidenti huzuridagi Xalq kutubxonasining ochilish marosimida ishtirok etdi. 

Ushbu majmua Turkiya rahbari Rejep Tayyip Erdog`an tashabbusi bilan bunyod etilgan. Mahobatli kutubxona kitob fondi (4 million bosma nashr va 120 milliondan ziyod elektron fayl) hamda xizmat darajasi bo`yicha dunyodagi eng ulkanlaridan biridir. Ushbu ma`naviy boylik maskani Prezident qarorgohi – Jumhurbashkanligi saroyi yonida qurilgani ham uning ahamiyatini ko`rsatadi.

Ochilish marosimida butun dunyodan ikki mingga yaqin mehmon - olimlar, yozuvchilar, ta`lim va madaniyat namoyandalari, davlat va jamoat arboblari qatnashdi. Shavkat Mirziyoev Turkiya Prezidenti tomonidan taklif etilgan oliy darajadagi yagona mehmon bo`ldi.

Marosimda Prezident Shavkat Mirziyoev nutq so`zladi. 

Davlatimiz rahbari shunday muhim va shukuhli voqeaga taklif uchun minnatdorlik bildirib, qardosh turk xalqini ushbu ilm-ma`rifat maskani bilan muborakbod etdi.

– Dunyodagi har qaysi davlat, har qaysi xalq birinchi navbatda o`zining intellektual salohiyati, yuksak ma`naviyati bilan qudratlidir. Bunday engilmas kuch manbai esa avvalo insoniyat tafakkurining buyuk kashfiyoti – kitob va kutubxonalarda, – dedi Prezidentimiz.

O`zbek va turk xalqlarining ildizi bir, ma`naviyati mushtarak. Imom Buxoriy, Beruniy, Xorazmiy, Ibn Sino, Jaloliddin Rumiy, Yunus Emro, Alisher Navoiy merosi xalqlarimizning milliy yuksalishiga katta hissa qo`shgan. Qozizoda Rumiy Samarqandda mudarrislik qilgan. Ali Qushchi hayotining so`nggi yillarini Istanbulda o`tkazgan. Abdurauf Fitrat, Muhammadsharif So`fizoda, Said Ahroriy kabi ko`plab jadid bobolarimiz Turkiyada tahsil olgan.

Bugungi kunda Istanbulda Abu Rayhon Beruniy nomidagi universitet bor. Turkiya kitob fondlarida Alisher Navoiy asarlarining 100 dan ortiq qo`lyozmalari saqlanib kelmoqda.

Davlatimiz rahbari yurtimizda zamonaviy maktablar, ilmiy-ma`rifiy markazlar tashkil etilayotganini ta`kidladi. 

Samarqandda Imom Buxoriy, Surxondaryoda Imom Termiziy nomidagi xalqaro ilmiy-tadqiqot markazlari, shuningdek, hadis, kalom, aqiyda, tasavvuf, fiqh maktablari ochilgan. Toshkent shahrida ko`p asrlik ma`rifat xazinasini namoyon etadigan, fundamental tadqiqotlar olib boriladigan Islom sivilizasiyasi markazi bunyod etilmoqda.

Bu yil ulug` allomalar Abduxoliq G`ijduvoniy va Bahouddin Naqshband tavalludlariga bag`ishlangan tadbirlar o`tkaziladi. Mahmudxo`ja Behbudiy tug`ilganining 145 yillik sanasi nishonlanadi. Shuningdek, joriy yilda Buxoro shahri Islom madaniyati poytaxti, Xiva shahri Turkiy dunyo madaniyati poytaxti deb e`lon qilingani munosabati bilan bir qator xalqaro anjumanlar tashkil etilishi rejalashtirilgan. 

Prezidentimiz turkiyalik olimlar, adabiyotshunos va dinshunoslarni ushbu madaniy-ma`rifiy tadbirlarga taklif etdi. O`zbekistonning kitob fondlarida 100 mingdan ziyod noyob qo`lyozma asarlar saqlanayotgani, ularning aksariyati o`z tadqiqotchilarini kutayotganini ta`kidladi.

Turkiya Prezidenti ushbu quvonchli ayyomda O`zbekiston Prezidenti rafiqasi bilan birga ishtirok etayotgani uchun tashakkur izhor etdi. 

- O`zbekiston biz uchun madaniy tasavvurimizni shakllantirgan, olimlarni etishtirgan, ilm, irfon va ma`naviy dunyomizni ta`minlagan hayotiy manbalarimizdan eng muhimidir, - dedi Rejep Tayyip Erdog`an. - Ilm muhiti asrlar davomida Toshkent bilan Anqara, Samarqand bilan Konyo, Buxoro bilan Bursa, Xiva bilan Edirneni bog`lab, o`zaro boyitgandir. Bu kun Xalq kutubxonasini Janobi oliylari bilan birgalikda ochib, mushtarak madaniyatimiz haqida butun dunyoga muhim bir ishora bermoqdamiz.

Shavkat Mirziyoev dunyoda o`ta noyob bo`lgan “Usmon Mushafi”ning xattotlarimiz tomonidan ko`chirilgan nusxasi, Jaloliddin Rumiyning mashhur “Masnaviy” asari hamda Abu Bakr ar-Roziyning “Kasalliklar tarixi” asari qo`lyozmalarining faksimile nusxalari, “Alisher Navoiy asarlarining Istanbul kutubxonalaridagi tasviriy nusxalari” nomli kitob-albom, Yunus Emro she`rlarining o`zbek tiliga tarjimasi jamlangan “O`lmas ko`ngul” deb nomlangan kitoblarni kutubxonaga tuhfa qildi.

Shuningdek, Turkiya Prezidenti huzuridagi Xalq kutubxonasiga 350 dan ziyod turli mavzudagi kitoblar taqdim etildi.

Shundan so`ng, Shavkat Mirziyoev va Rejep Tayyip Erdog`an rafiqalari hamrohligida Turkiya Prezidenti huzuridagi Xalq kutubxonasi faoliyati bilan tanishdi.

Bu muhtasham kutubxona bugun ochilgan edi, Prezidentimiz va rafiqasi uning birinchi faxriy mehmonlari bo`lishdi.

Noyob kitoblar ko`rgazmasi namoyish etildi. 

Turkiya Prezidenti davlatimiz rahbariga shunday nodir asarlardan birini sovg`a qildi.

Shu bilan Prezident Shavkat Mirziyoevning Turkiyaga tashrifi yakunlandi. Davlatimiz rahbarini «Esonbug`a» aeroportida Prezident Rejep Tayyip Erdog`an kuzatib qo`ydi.

 

 

Шарҳлар