13

75 nafar ishga joylashgan yoshlar, 10 gektarli yangi bog` va 15 ta imtiyozli kredit: G`allaorolda prokuror va yoshlar uchrashuvi amaliy natijaga boy bo`ldi

Jamiyat 26.02.2020, 20:43
564
75 nafar ishga joylashgan yoshlar, 10 gektarli yangi bog` va 15 ta imtiyozli kredit: G`allaorolda prokuror va yoshlar uchrashuvi amaliy natijaga boy bo`ldi

kecha, 25 fevral kuni G`allaorol tumanidagi tibbiyot kolleji binosida viloyat prokurori I.D.Ergashxodjaev, tuman prokurori S.Razzokov hamda Jizzax xarbiy prokurori O.Xaydarovlar tomonidan yoshlar bilan uchrashuv va ommaviy qabul bo`lib o`tdi.

Uchrashuv boshlanishidan oldin viloyat prokurori boshchiligidagi ishchi guruh “Mahalla” markazida tashkil etilgan “Yosh tadbirkorlar” tomonidan ishlab chiqarilgan mahsulotlar yarmarkasi va markaz qoshida yangidan tashkil etilgan “Ibratli chevar qizlar” tikuv sexi faoliyati bilan tanishdi.

Shundan so`ng, yoshlarni kasb-xunarga yo`naltirish va ularning bandligini ta`minlash maqsadida tibbiyot kolleji binosida bo`sh ish o`rinlari yarmarkasi tashkil etildi. Yarmarkada 170 nafar yoshlar ishtirok etib, shundan 75 nafari ishga joylashtirildi. Shundan 64 nafari “Sangzor tekstil” MChJga, qolgan 11 nafari tuman tibbiyot birlashmasi, Avtomobil yo`llaridan foydalanish va ta`mirlash korxonasi hamda 14-sonli maktabgacha ta`lim muassasalarigadir.

O`z navbatida, Prezidentimiz tomonidan ilgari surilgan 5 ta muhim tashabbus doirasida yoshlarni musiqa, rassomlik, adabiyot, teatr va san`atning boshqa turlariga qiziqishlarini oshirishga, iste`dodlarini yuzaga chiqarishlariga ko`maklashish, ularni jismonan chiniqtirish, sport sohasidagi qobiliyatlarini namoyon qilishlari uchun zarur sharoitlar yaratish maqsadida sportning kurash, shaxmat, stol tennisi turlari bo`yicha hamda yoshlar ma`naviyatini yuksaltirish, ular o`rtasida kitobxonlikni keng targ`ib qilish bo`yicha maktablararo katta musobaqa bo`lib o`tdi. 

Musobaqaga jami bo`lib 21 ta maktab jamoalaridan  300 ga yaqin o`quvchilar ishtirok etishdi. Maktablararo o`tkazilgan musobaqa qizg`in bahslarga boy o`tdi.
Yana bir quvonarli tomoni, tadbir davomida yoshlarda faol fuqarolik pozisiyasini, Vatanga muhabbat, milliy mustaqillik g`oyalariga sodiqlik hissini shakllantirish maqsadida xarbiylarning jangovar sahnaviy ko`rinishlari namoyish etildi.

Tadbir navbatida, prokuratura tashabbusi bilan tashkil etilgan “Mirzabuloq” qishloq fuqarolar yig`ini, Xonaqoq qishlog`idagi 10 gektar er maydoniga “Yoshlar bog`i” barpo etilib, tadbirga yig`ilgan 300 dan ziyod yoshlar ishtirokida ko`chat ekishni viloyat prokurori boshlab berib, 2200 tup mevali va manzarali daraht ko`chatlarini ekish ishlari amalga oshirildi. Shundan 1800 tasi mevali, 200 tasi manzarali va 200 tasi archadan iborat.

Ushbu tadbirlardan so`ng, viloyat prokurorining tuman moliya bo`limi binosida tuman yoshlari bilan uchrashuvi o`tkazildi. Ochiq muloqot tarzida o`tkazilgan uchrashuvda 200 nafar yoshlar ishtirok etib, shundan 30 nafari o`zlarining muammo va takliflari bilan murojaat etishdi. Shundan 16 tasi qanoatlantirildi. Jumladan, “Har bir oila tadbirkor” davlat dasturi doirasida 15 nafariga imtiyozli kreditlar ajratish bo`yicha sertifikatlar berilib, 1 nafarining prokuratura xodimidan yoshlar etakchisini tayinlash haqidagi taklifi ma`qullandi. Qolgan murojaatlarning ijrosi viloyat prokuraturasi tomonidan alohida nazoratga olindi.

Tadbir yakunida, qarzdorlar I.Abdujalilovdan 550.000 so`m, A.Ikromovdan 1.634.000 so`m va Z.Barakaevdan 1.704.000 so`m jami 3.888.000 so`m aliment pullari undiruvchilar S.Abdujalilova, A.Ikromova va O.Barakaevalarning voyaga etmagan farzandlarining ta`minoti uchun undirib berildi. Shuningdek, muayyan yutuqlarga erishgan, fan olimpiadalari va turli xalqaro sport musobaqalarida sovrinli o`rinlarni qo`lga kiritgan va kam ta`minlangan 48 nafar yoshlarga tashakkurnoma, badiiy kitoblar va boshqa sport anjomlaridan iborat esdalik sovg`alari topshirildi. 

Uchrashuvdan so`ng, yoshlarni kasbga yo`naltirish, ularni tadbirkorlikka jalb qilish va ishlab chiqarish korxonalarining faoliyati bilan tanishtirish maqsadida tumandagi “Sangzor tekstil” mas`uliyati cheklangan jamiyatiga sayohatlari tashkil etildi. 

Bundan tashqari, tibbiyot kolleji binosida Jizzax viloyat mobil poliklinikasi va Sog`lom avlod jamg`armasi mutaxassislari tomonidan 203 nafar shaxslar tibbiy ko`rikdan o`tkazilib, kasalligi anqilangan 130 nafar bemorlarga 18 turdagi 716 o`ramdan iborat dori-darmon vositalari bepul tarqatildi.

Tadbir ketma-ketligida shu kunning o`zida viloyat prokurorining ommaviy qabuli boshlanib, unda 100 nafar fuqarolar ishtirok etdi. Ulardan 34 nafaridan murojaatlar kelib tushib, shundan 15 tasi joyida qanoatlantirildi (5 nafariga qo`ltiqtayoq va hassalar, 2 nafariga davolanishlari uchun order berilib, 5 nafarining uy-joylarining kadastr hujjatlari ramiylashtirilishiga va 3 nafariga moddiy yordam tayinlanishiga ko`maklashildi). Qolgan murojaatlar qonunda belgilangan tartibda ko`rib chiqilishi ta`minlanadi.

Шарҳлар