Avtotransport vositalariga maxsus ruxsatnoma faqat uch turdagi xizmat mashinalari uchun beriladi (ro`yxat)

Avval xabar berganimizdek, Respublika maxsus komissiyasi avtotransport vositalari uchun maxsus ruxsatnoma yangi tartib ishlab chiqildi. Tartibga ko`ra, quyidagi turdagi avtotransport vositalariga maxsus ruxsatnoma beriladi:

• birinchi, oziq-ovqat mahsulotlari (jumladan tamaki va alkogol) va tibbiyot buyumlarini ishlab chiqaruvchi ishlab chiqaruvchi va realizasiya qiluvchi tadbirkorlar va u erda ishlaydigan xodimlarning avtotransport vositalariga. Bunda dorixonalar uchun faqat har bir dorixonaga bir dona avtotransportga ruxsat beriladi;
• ikkinchi, umumiy ovqatlanish korxonalarining etkazib berish xizmatini (kurer va “dostavka”) ko`rsatayotgan avtotransport vositalari, shuningdek, mazkur korxonalarda doimiy ishlovchi xodimlarning shaxsiy avtotransportiga;
• uchinchi, Toshkent viloyatining Yuqori Chirchiq va Zangiota tumanlarida, Toshkent shahrining Olmazor, Chilonzor va Yashnobod tumanlarida barpo etilayotgan shifoxona va xiyobonlar qurilishiga jalb etilgan yuridik shaxslar va yakka tartibdagi tadbirkorlarga tegishli M1 toifadagi avtotransport vositalariga.

Shuningdek, ishlab chiqarish va texnologik jarayoni to`xtatilishi mumkin bo`lmagan korxonalar, gigienik niqob ishlab chiqaruvchi tashkilotlar, dehqon bozorlarining xodimlariga tegishli vazirlik va idoralarning Adliya vazirligiga kiritadigan murojaatiga asosan alohida ruxsatnomalar rasmiylashtirib beriladi.

Bundan tashqari, maxsus ruxsatnomasiz harakatlanish huquqi berilgan avtotransport vositalari ro`yxati ham tasdiqlandi.

Masalan, tashkiliy-huquqiy shaklidan qat`i nazar sog`liqni saqlash tizimidagi tashkilotlarning, tibbiy-sanitariya va epidemiologik xizmatlar ko`rsatuvchi tashkilotlarning xizmat mashinalari va xodimlarining shaxsiy avtotransport vositalariga ruxsatnoma talab etilmaydi.

Bunda mazkur tashkilotlarning xodimlari ushbu ko`rsatilgan tashkilotlarda faoliyat yuritayotganligi to`g`risidagi mehnat daftarchasi nusxasi va ish joyidan tasdiqlovchi hujjat asosida harakatlanadi. Ushbu xodimlar faqat ish joyiga etib borish va uyga kelish maqsadida o`z avtotransportidan foydalana oladi, ya`ni faqat xizmat yuzasidan harakatlanishiga yo`l qo`yiladi.

Xuddi shunday, mavsumiy qishloq xo`jaligi mahsulotlarini etkazib beruvchi M1 (bir nafar yo`lovchi bilan) toifadagi jismoniy shaxslarga tegishli shaxsiy avtotransport vositalariga ruxsatnoma talab etilmaydi. Bundan ko`zlangan maqsad, bozorlarga oziq-ovqat mashulotlarini erkin kirib kelishini ta`minlash va narxlarning asossiz oshib ketishini oldini olishdir.

Maxsus ruxsatnomani olish tartibi, shuningdek avtotransport vositalari harakatlanishiga maxsus ruxsatnomalar talab etilmaydigan holatlar ro`yxati OAV orqali e`lon qilindi. Ular bilan batafsil tanishib chiqishingiz, unda belgilangan cheklovlarga qat`iy amal qilishingiz so`raladi.

Shu bilan birga bugungi kundagi ijtimoiy masofalashuvni saqlash (jamoat joylarida ham 1,5-2 metr masofani saqlash), ko`chalarga muhim zaruriyat bo`lmaganda chiqmaslikka chaqiramiz.

Avtotransportlar harakatining cheklanishi noqulayliklar tug`dirishi tabiiy, shu bilan birga respublikada koronavirusning keng tarqalib ketishini oldini olishda hozirgi sharoitda bu eng zarur va maqbul yo`ldir.