Koronavirus bilan xastalangan bemorlar shifokorlar muolajasi tufayli ahvollari yaxshilanayotganini e`tirof etishmoqda, deya xabar qildi Sog`liqni saqlash vazirligi Jamoatchilik bilan aloqalar bo`limi.
Ta`kidlanishicha, Virusologiya ilmiy tekshirish instituti direktori, tibbiyot fanlari doktori, professor Erkin Isakovich Musabaev rahbarligidagi tajribali jamoa koronavirus infeksiyasiga chalingan bemorlarni davolashda alohida faollik ko`rsatishmoqda.
Ular Jahon sog`liqni saqlash tashkiloti tavsiyalari asosida, ilg`or mamlakatlar tajribasidan kelib chiqib, xalqaro standartlar bo`yicha tezkor va sifatli davolash muolajalarini olib borishmoqda. Ushbu jarayonda tibbiyot xodimlari birdamlikda, bor mahorati va tajribasini ishga solgan holda mehnat qilishmoqda. Oilasi, yaqinlari, xalqimiz uchun ishda qolib, koronavirus infeksiyasini mag`lub etish harakatida. Shu bilan birga, shirin muomalasi va daldasi bilan ham bemorlarga ruhiy madad bo`lishmoqda.
"Biz videomuloqot orqali Virusologiya ilmiy-tekshirish instituti klinikasida davolanayotgan bemorlarning ahvoli, fikr-mulohazalari bilan qiziqdik. Bemorlar shifokorlarning juda mas`uliyat bilan to`g`ri davolash muolajalarini olib borishayotganini e`tirof etishib, kun sayin ahvollari yaxshilanib borayotganini bildirishmoqda. Bu haqda quyidagi videolavhada tanishishingiz mumkin", — deya shifo topayotgan bemorlardan jonli suhbat taqdim etilgan.
