Koronavirusdan shifo topgan bemor klinika eshigiga xat yozib qoldirdi

COVID-19 infeksiyasidan shifo topgan Nik Braun ismli inson o`zi davolanib chiqqan Ogayo klinikasining eshigiga xat yozib qoldirdi. Bu haqda The Mirror xabar berdi.

38 yoshli bu erkak koronavirus infeksiyasini juda og`ir o`tkazdi. Shifokorlar uning o`pkasini sun`iy ventilyasiya uskunasiga ulab qo`yishdi. Xotiniga esa erining ahvoli og`irligini, agar yuragi ko`tara olmasa vafot etishi ham mumkinligini aytishdi. 

Har kuni tibbiyot xodimlari bemorga eshikning oynali derazasida uning ko`nglini ko`taruvchi maktublar yozib qoldirishar, u og`ir ahvolda yotganida ham "biz sizni tez orada uyingizga kuzatib qo`yamiz", "siz yaqinlaringizga keraksiz", "tezroq tuzaling, uyingizda sizni kutishmoqda" kabi so`zlarni o`qib yotardi. Yuziga tabassum yugurardi.

Nik Braun kasallikdan tuzalgach, ketish oldidan u ham shifokor va hamshiralarga javob xati yozib qoldirdi. 

"Bu eshik oynasi mening hayotimda juda muhim bo`lib qoldi. Men uzun kunlar sizning mashaqqatli ishingizni kuzatib yotdim, siz meni va men kabi bemorlarni qutqarish uchun barcha ishni qildingiz. Men o`shanda sizga minnatdorlik bildira olmadim. Menga qilgan bu yaxshiliklaringizni qaytara olamanmi... Ammo hech qachon kasal bo`lmang. Sizlar haqiqiy qahramonsizlar!"