ДХХ матбуот хизмати тақдим этган видеолавҳада Бобомурод Абдуллаевнинг президент Шавкат Мирзиёевга мурожаати акс этган.
Абдуллаев мурожаатида Бишкекдан Тошкентга олиб келиниши жараёнида Давлат хавфсизлик хизмати ходимлари унга инсоний муносабатда бўлишганини таъкидлайди.
Унинг сўзларига кўра, Абдуллаевнинг онаси Ўзбекистон президентига мурожаат қилган.
“Онам сизга тақдиримдан хавотир олиб мурожаат қилган экан. Шу онаизорнинг мурожаатини ерда қолдирмай кўриб чиқибсиз. Сиздан Аллоҳ рози бўлсин, каттадан-катта раҳмат, ҳурматли Шавкат Миромонович”, дейди Бобомурод Абдуллаев.
Абдуллаев Ўзбекистон президентининг инсонпарварлик йўналишида олиб бораётган сиёсати албатта ўз мевасини беришига ишонч билдирган ҳамда онасининг ва ўзининг мурожаатини инобатга олгани учун миннатдорлик билдирган.
Натижада, Ўзбекистонга экстрадиция қилинган журналист Бобомурод Абдуллаев муносиб хулқ-атвор қоидаларига риоя қилиши тўғрисидаги тилхатга асосан озод қилинди. Бу ҳақда Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов маълум қилди.
