Наманган вилояти бир нечта туризм йўналишларини ўзида мужассам этганлиги ва воҳалардаги машҳур қадамжоларимиздан қолишмайдиган диққатга сазовор жойларига эга эканлигидан хабардормисиз? Кўпчиликда “йўқ” деган жавоб бўлиши табиий. Бугунги саҳифамиз орқали эса Наманган ҳақидаги тасаввурингиз мутлақо ўзгариб, сизда водийга бориш истаги туғилиб қолиши аниқ. Биз ҳам Туризмни ривожлантириш давлат қўмитаси ва ОАВ вакиллари ҳамкорлигида ташкил этилган пресс-тур баҳона вилоятнинг туристик салоҳиятидан баҳраманд бўлдик ва таасуротларимизни сизга ҳам илиндик. Демак, сабабларни санашни бошлаймиз.
1. НАМАНГАН — ГАСТРОНОМИК ТУРИЗМ УЧУН ЭНГ ЛОЙИҚ ТАНЛОВ
Чуст оши азалдан минглаб сайёҳларни ўзига жалб этиб келган. Чуст тумани марказида жойлашган, бошқа жойда ўхшаши йўқ истироҳат боғида жазирама кунда ҳам ҳарорат салқинлиги жиҳатидан кўчага нисбатан 5-6 даража фарқ қилади. Айнан шу ердаги соя-салқин сўриларда ўтириб, маза қилиб Чуст ошидан тановул қилишингиз мумкин. Мана шу гастрономик туризмдир. Бу рўйхатни давом эттирсак, Косонсойнинг мантилари, Норин ва Мингбулоқнинг балиқлари, Янгиқўрғон Нанайидаги беш бармоқ таомининг анча машҳурлиги бор. Наманган шаҳрида тайёрлаш йўл қўйилган тандирга косаси билан ёпиладиган сомса ҳам ўзига хослиги билан ажралиб туради.
Бундан ташқари Учқўрғонда қулупнай, Тўрақўрғонда гилос, Чустнинг Ахчасида узум, Мингбулоқда тарвуз, Попда қовун сайли каби сайлларнинг ўтказилиши ҳам ҳам маҳаллий ва хорижий сайёҳларни ўзига жалб қилмоқда.
2.ЧУСТ ДЎППИЛАРИ ВА ПИЧОҚЛАРИНИ ЖОЙИДАН ОЛАМИЗ
Чуст туманига келсангиз, албатта туман аҳолисидан пичоқчилик ва дўппичилик маҳаллаларини сўранг. Чуст истироҳат боғидаги сўлим ҳавода ошни паққос тушириб бўлгач, айнан ўша маҳаллаларга борсангиз, боққа туташ хонадонларда аёллар дўппичилик билан, эркаклар эса пичоқчилик билан шуғулланаётганининг гувоҳи бўласиз. Нархларга келсак, 30 минг сўмдан бошлаб 300 минг сўмгача бўлган дўппиларни, 30-минг сўмдан 500 минг сўмгача бўлган пичоқларни хоҳлаганча талашиб-тортишиб харид қилишингиз ва шунинг баробарида мазкур қўл меҳнати маҳсулотларининг тайёрланиш жараёнини ҳам ўз кўзингиз билан кўришингиз мумкин. Бу бозордан шунчаки маҳсулот олганга қараганда анчайин қизиқ жараён.
3. ЭРАМИЗДАН АВВАЛГИ “МЕГАПОЛИС”
Наманганнинг Тўрақўрғонида бир тепалик бор. Бу тепаликда эрамиздан аввалги III асрда ташкил топган Ахсикент шаҳрининг харобалари ётади. Очиқ осмон остида жойлашган музейга айлантирилган бу қадимий шаҳар харобаларини томоша қилиб, ўтмишга саёҳат қиласиз. Ёши жиҳатидан Афросиёбга тенглаштирилган, “Фарғона Афросиёби” номини олган Ахсикент тарихи йиллар давомида ўрганилиб келинса-да, у қадар кўп эътибор қаратилмаган. 2017 йилда Президентимиз Шавкат Мирзиёевнинг Наманган вилоятига ташрифидан сўнг бир пайтлар майдони 400 гектарга яқин, аҳолиси эса 200 мингдан зиёд бўлган “мегаполис” шаҳрига жиддий эътибор қаратила бошланган.
Нима учун Ахсикент?
Ёзма манбаларининг гувоҳлик беришича, Фарғона водийсидаги энг қадимги пойтахт ва шаҳари, Буюк ипак йўлининг асосий шаҳарларидан бири Ахсикент ўрта асрларда ўзбек давлатчилиги тарихида муҳим ўрин тутиб, жуда кўп салтанатлар учун пойтахт вазифасини ўтаган. Ахсикентда тайёрланган қуроллар “Дамашқ қиличлари” номи билан дунёга машҳур бўлиб, Ғарбда Дамашқ, Шарқда Хитой бозорларида сотилган. Тарихий манбаларда, хусусан, “Бобурнома”да бу кентнинг алоҳида аҳамияти ҳақида кўп ёзилган. Қадимдан бу ерда ер ости сув иншооти бўлгани боис мудофаа учун қулай саналган. Шаҳар Арк, ички ва ташқи шаҳардан иборат бўлган. Бу ерда ўз даврида шишасозлик, кулолчилик, темирчилик, қуролсозлик каби ҳунармандлик турлари ривожланган. 1621 йилги кучли зилзила оқибатида эса вайрон бўлган ва қайта тикланмаган.
Бугунги кунда харобаларнинг 60 гектарга яқин қисми сақланиб қолган бўлиб, Фарғона водийсидаги энг катта археологик ёдгорликдир. Бугунги кунда қадимий Ахсикент ёдгорлиги ЮНЕСКО бутунжаҳон маданий мероси объекти ҳисобланади.
Чипта нархлари ҳам қиммат эмас
Тарихий шаҳарга кириш ва экспонатлар билан танишиш учун билет сотиб олиш лозим. Чипта катталар учун (Ўзбекистон резидентларига) 2 000 сўм, мактаб ўқувчилари учун 1000 сўм, 7 ёшгача бўлган болалар учун бепул, хорижлик сайёҳлар учун 10 000 сўм, гид хизмати эса 5 000 сўм туради.
Очиқ осмон остидаги музей дам олиш кунисиз эрталаб 9:00 дан кеч соат18:00 гача ишлайди.
4. ГРУЗИЯДА БОРЖОМИ, БИЗДА ЭСА ЧОРТОҚ СУВЛАРИ
Чортоқ туманида 507 метр чуқурликдан олинадиган соф минерал сувлар ошқозон-ичак тизими, жигар, ўт пуфаги йўллари, ошқозоности бези ҳамда қандли диабет каби хасталикларни даволашда кенг қўлланилади. Бундан ташқари, оғиз бўшлиғи, қизилўнгач ва ошқозонга механик, термал ва кимёвий таъсир кўрсатиб, ошқозон шираси ажралишини яхшилайди. Грузиянинг Боржоми туристик шаҳрига боролмаяпсизми? Унда Чортоққа келинг. Чунки ҳавоси ва маъданли сувларининг шифобахшлиги бўйича улар бир-биридан қолишмайди.
5. МУҚАДДАС ҚАДАМЖОЛАР
Сўнгги йилларда вилоятдаги эски зиёратгоҳларга қаратилаётган эътиборлар сабабли турли қадимий ва қутлуғ қадамжолар қайта тикланмоқда. Жумладан, сизга тавсия этишимиз мумкин бўлганларидан Чустдаги Бибиона ёдгорлиги ва Чортоқдаги Султон Увайс Қароний зиёратгоҳларидир. Ўз тарихи, афсоналари, сўлим табиати ва шифобахш булоқ сувларига эга бу муқаддас зиёратгоҳлар сизда олам-олам таасуротлар қолдириши табиий.
“Сўнгги бронза ва илк темир даврига оид Чуст манзилгоҳи, яъни Бибиона ёдгорлигининг ҳозирги кундаги сақланиб қолган ер майдони 4,05 гектарни ташкил этади. Археологик ёдгорлик ҳудудида қадимий шифобахш булоқ мавжуд бўлиб, ушбу булоқ Бибиона-Қайнар булоқ номи билан машҳур. Бу булоқ сувларига кўзинларгизни ювсангиз, улар равшанлашади. “Биби она” (ҳиндча “Муқаддас аёл”) 10 асрларда яшаб ўтган. У вафот этгач, унинг жасадини шу зиёратгоҳдаги булоққа ташлашган. Шундан сўнг бу ерда йиғинлар бўлса, у ерда ҳақоратли сўзлар ишлатилса, булоқ ўз-ўзидан тошиб кетган. Бу ерлар улуғ инсонларнинг ҳам қадами етган жой ҳисобланади. Амир Темур, Умаршайх Мирзоларнинг дам олиш зонаси бўлган”, - дейди чустлик тарихчи олим Мансур Инъом.
6. ДУНЁДА ТЎРТТА, МАРКАЗИЙ ОСИЁДА ЯГОНА БЎЛГАН ЮРТИМИЗДАГИ ҲАҚИҚАТГА АЙЛАНГАН “АФСОНА”
“Афсоналар водийси” — майдони ва ҳашамати жиҳатидан Марказий Осиёдаги энг йирик кўнгилочар истироҳат боғларидан бири. Олдинга қўйилган мақсадини уддалай олган наманганлик тадбиркор 123 миллион долларлик ушбу лойиҳанинг 102 миллион долларлик ҳаражатларини ўз ҳисобидан молиялаштирган. Бу ерга келиб, ҳаммасини ўз кўзингиз билан кўриб, “пулига яраша экан” деган хулосага келасиз. 16 турдаги аттракционли тематик парк, 2400 ўринли амфитеатр, 7 хил сув аттракционлари ва 16 та бассейнли аквапарк, 2 та замонавий шаршара ва ҳайбатли мусиқали фаввора, 3 та тематик ресторан, 1800 ўринли 2 та йирик автотураргоҳ ташкил этилган. 2022 йил март ойига қадар эса миллий ҳунармандлар маркази, масжид, 400 ўринли меҳмонхона, 110 та виллани ишга тушириш режалаштирилган. Ҳатто 2 йилгина олдин ҳам Наманган шаҳрининг бу ҳудудида қачондир бундай ободончилик бўлиши кимнинг хаёлига келибди, дейсиз. Бугун эса барча афсоналар ҳақиқатга айланган.
7. ФИНЛЯНДИЯНИ ТАКРОР ЭТУВЧИ ЧОДАК ҚИШЛОҒИ
Қамчиқ довонига етмай туриб, Фарғона водийсининг энг гўзал гўшаларидан бири Поп туманининг Чодак қишлоғи бошланади. У серсув, тоза ҳаво ва тошқин сув келтирувчи бетакрор сой ёқасида жойлашган. Атрофи эса тоғлар билан ўралган ғоят сўлим ва хушҳаво макон. Сиз бошқаларга айнан шу гўшада бўлганингиз билан мақтанишингизга арзирли сабаблар бор:
Чодаксой бўйидаги бир гектарлик майдонда Финляндия муҳитини берувчи ажойиб дам олиш маскани барпо этилмоқда. Айни пайтда фин услубида қурилган, ҳар бири икки ўринли, барча қулайликлар мавжуд учта кемпинг қурилган бўлса, эндиликда 10 та ўтов, маҳаллий ўзига хос таомларни таклиф этувчи тематик ошхона барпо этиш ишлари бошланган. Бундан ташқари 7 та икки қаватли коттедж типидаги меҳмон уйларининг ҳам қуриш ишлари бошланиб, пойдевор қуйилган.
ХУЛОСА ЎРНИДА
Булар Наманган вилояти ҳақида атиги 7 та сабаб эди, холос. У ердан қайтар эканмиз, вилоят ҳақида ҳали биз билмаган, биз бўлмаган, кўрмаган, ёритмаган қанча мавзулар қолиб кетаётганидан афсусландик. Чунки Наманган олам-олам таасуротлар манзили. Табиатидан тортиб инсонларигача фақат табиийликни ҳис қиласиз. Ҳамма ҳам кўрганига ишонади. Сиз ҳам келинг, кўринг ва завқланинг. Биз эса бир нарсага ишонамиз: Наманганни албатта яхши кўриб қоласиз!
Сардорбек РАҲМОНҚУЛОВ ва Анвар ИКРОМ тайёрлади
