Куни кеча ижтимоий тармоқларда пойтахтимизнинг Чилонзор туманидаги 33-оилавий поликлинкада “Янги Ўзбекистонда ҳамшира ва шифокорлар бош врач машинасини ювади…” номли расм ва пост эълон қилинган эди.
Zamon ушбу пост билан боғлиқ хабарларга ойдинлик киритиш мақсадида мазкур поликлиника бош врач ўринбосари Ойдин Ҳолмуродовадан изоҳ сўради. Мутахассис мазкур маълумот ёлғон эканлигини, машина ростан ҳам бош врачга тегишли бўлиб, шу кунга қадар шифокор ва ҳамширалар машина ювиш ишларига хеч қачон жалб қилинмаганини айтган.
Ўринбосар ўша куни кичик тиббиёт ходимлари томонидан поликлиниканинг орқа ҳовлисида ҳазонлардан тозалаш ишлари олиб борилганини, тозалашдан сўнг супургидан тўкилган ҳас чўпларни қўл билан тераётганида кимдир бу суратни олганини таъкидлади.
Лекин, "суратга эътибор бериб қаралса, оқ ҳалатдаги тиббиёт ходимлари машина устини артаётганини кўриш мумкин. Эътиборлиси машина ёнида челак ҳам бор..." дейилади хабарда.
Балки ушбу вазиятда хатолик бўлганини тан олиб, иккинчи бу иш такрорланмаслиги ҳақида айтилса тўғрироқ бўлармиди. Ишчи-ходимлардан ўз шахсий хизматчиси сифатида фойдаланувчи раҳбарлар жамиятимизда учраб туради.
Ҳар қандай ҳолатда ҳам жамоатчилик назорати деган қонун борлиги ва бугунги кунда у ишлаётганини шундай раҳбарларга эслатиб қўйилгани ибратли бўлди ҳар ҳолда.
