Кеча Президент Шавкат Мирзиёев “Ўзбекфильм” киностудиясининг янги биносида кино фаоллар билан учрашиб, энг сара ўзбек фильмлари 100 талигини тузиш, уларни давлат ва хусусий телеканалларда намойиш қилиш, кино санъатимиз фидойиларини эътироф этиш мақсадида ҳар бир ҳудуд умумтаълим мактабларига эл севган ижодкорлар номини бериш каби таклифларини берганлиги ҳақида хабар қилган эдик. Ўзбек киносаноати учун тарихий кун сифатида баҳоланаётган бу учрашувдан сўнг қандай ўзгаришлар бўлади? Бу ҳақида сиз кино ихлосмандларини хурсанд қиларли яна бир қатор яхши янгиликлар борлигидан хабардор қилишни жоиз топдик.
“Ўзбеккино” Миллий агентлиги директори Фирдавс Абдуҳолиқов ҳам бу учрашувдан тўлқинланиб, ўз ҳаяжонларини биз билан бўлишди:
“Бугун биз учун “олтин” ва тарихий кун бўлди. Чунки йиллар давомида ташландиқ ҳолатда бўлган “Ўзбекфильм” киностудияси биноси Президентимиз ташаббуси билан янгидан ишга туширилди. Бироз ҳаяжондаман, сабаби бу жуда кўплаб кино ижодкорларнинг орзуси эди. Биз бу кунни орзиқиб кутгандик. Нега? Чунки бу бино – тарихий бино. 60 йилдан ошди. Бу ерда қандай буюк ижодкорлар ишлаган, буюк кино асарлари яратилган. “Ўзбекфильм” киностудияси ташкил қилинганига бу йил 95 йил тўлди. Агар Марказий Осиё кино ватани қаер деб сўрашса, бу албатта Ўзбекистон дейишади. Буни ҳамма билади. Чунки 1910 йилда биринчи ўзбек оператори Худойберди Девонов қўлида камера кўтариб, илк кадрларни суратга олган”.
ШИФОКОРЛАР ВА ЎҚИТУВЧИЛАР ҲАҚИДА СЕРИАЛ
— Бугун икки суратга олиш павильонини ишга туширдик. Шу билан бирга иккита студияни ишга тушириб миллий фильмлар олишни ҳам бошлаймиз. Биринчи навбатда шифокорлар ва ўқитувчилар ҳақида сериал суратга оламиз. Бу шароитлар ўзбек киноси учун жуда катта туртки бўлади. Бугун президентимиз “бу ерга хушхабарлар билан келдим” деб барчанинг кўнглини кўтардилар. Бузилиб кетган “Киночилар уйи”ни қайта тиклаш, киноарбоблар учун иккита кўп қаватли уйлар қуриш, Кино академия ташкил этиш, техникалар базасини кучайтириш бўйича кўрсатмалар бериб, суҳбатимиз жуда самимий ва яхши кайфиятда ўтди. Бундан ташқари, “Тошкент” кинофестивалини ҳам қайта тиклаш ҳақида айтганларида бу янгилик қарсаклар билан кутиб олинди. Бу нафақат ўзбек киноси, балки, бутун юртдошларимиз учун ҳам жуда қувончли хабар бўлди.
МИЛЛИЙ СЕРИАЛЛАР БЎЙИЧА ҚАНДАЙ ТОПШИРИҚЛАР БЎЛДИ?
— Президентимиз томонидан миллий сериалларни кўпайтириш бўйича топшириқлар бўлган. Нодавлат телеканаллар ҳам бу бўйича ўз хиссасини қўшишяпти. Лекин шу билан ҳам телеканалларда чет эл сериаллари барибир кўпайиб кетган. Хозирда 12 та миллий сериаллар лойиҳаси тайёр бўлган. Уларни бадиий кенгашдан ўтказдик. Юқорида айтганимдек, шифокорлар ва ўқитувчилар ҳақидаги сериалларимиз бугун фойдаланишга топширилган киностудия павильонида суратга олинади. Сериаллар суратга олишда илк қадам – уларнинг савиясини ошириш. Яратилган сериалларнинг ҳар бир қисми учун 15 миллион сўм “Ўзбеккино” Миллий агентлиги, 15 миллион сўм нодавлат телеканаллар тўлайди. Бугун президентимиз 20 қисмдан кам бўлмаган тарихий сериаллар суратга олиш кераклигини ҳам таъкидладилар. Бу жуда катта масъулиятли ва фахрли лойиҳа. Бу бўйича молиявий томондан ҳам ёрдам бераман дедилар. Бунинг учун барча кино ижодкорларимизни бирлаштиришимиз керак. Шунча йиллар давомида улар ҳам рақобат нуқтаи назаридан, ҳам балки, шароит нуқтаи назаридан тарқалиб кетгандир. Бу дўстликка, ҳамжиҳатликка, яхши асарлар яратилишига сабаб бўлади. Бир ойдан кейин биринчи яратган сериалимиз эфирга узатилади.
Сардорбек Раҳмонқулов суҳбатлашди
Мазуга оид:
Эски Тошкент авиация заводи ва бугунги Технопаркни солиштирамиз (фото)
