my5
Sevimli

Андижон ва Наманган вилоятларидаги ҳарбий қисмларда хизматни ўташ ҳолати муҳокама қилинди

ЖАМИЯТ 03.12.2020, 19:32
Андижон ва Наманган вилоятларидаги ҳарбий қисмларда хизматни ўташ ҳолати муҳокама қилинди

Бугун, 3 декабрь куни Олий Мажлис Сенати Мудофаа ва хавфсизлик масалалари қўмитасининг видеоконференцалоқа тарзида мажлиси бўлиб ўтди. Унда Сенат аъзолари, тегишли вазирлик ва идоралар мутасаддилари ҳамда оммавий ахборот воситалари вакиллари иштирок этди. 

Мажлисда Сенатнинг Мудофаа ва хавфсизлик масалалари қўмитаси томонидан “Умумий ҳарбий мажбурият ва ҳарбий хизмат тўғрисида”ги Ўзбекистон Республикаси Қонунининг сафарбарлик чақируви резервидаги ҳарбий хизматни ташкил этиш ва ўташга оид қисмининг Андижон ва Наманган вилоятларидаги ҳарбий қисмларда ижро этилиши ҳолати юзасидан олиб борилган ўрганиш натижалари муҳокама қилинди. 

Таъкидланганидек, сафарбарлик чақируви резерви хизматчилари билан ўтказиладиган ҳарбий йиғинларнинг муддати ҳар йили Ўзбекистон Республикаси Президентининг “Ўзбекистон Республикаси фуқароларини сафарбарлик чақируви резервидаги хизматга олиш ва ойлик ҳарбий йиғинларни ташкиллаштириш тўғрисида”ги фармойиши ҳамда Ўзбекистон Республикаси мудофаа вазирининг тегишли буйруғига мувофиқ белгиланади. Шунга асосан ҳарбий йиғинлар йилнинг ўн икки ойи давомида ташкил этилади.

Андижон ва Наманган вилоятлари Мудофаа ишлари бошқармалари ва уларнинг тизимидаги туман ва шаҳар бўлимлари томонидан сафарбарлик чақируви резерви хизматига жалб қилинган ва тегишли пул бадалларини тўлиқ тўлаган чақирилувчиларнинг ойлик йиғинлари ҳудудийлик принципи асосида Андижон вилояти Андижон шаҳрида ҳамда Наманган вилояти Поп туманида жойлашган 528 ва 530 – СЧР батальонларида ўтказиб келинмоқда. Мазкур батальонларда белгиланган режадан келиб чиққан ҳолда ҳар ойда 1200-1250 нафар СЧР хизматчилари йиғинларни ўтаб кетмоқда.

Мажлисда ўрганиш натижалари ва таҳлиллар сафарбарлик чақируви резервидаги хизматга оид қонун ҳужжатларида тафовутлар мавжудлиги, шунингдек, ушбу хизматни ташкил этиш ва ўташ, чақирувга қадар бошланғич тайёргарлик фанини малакали ўқитувчилар билан таъминлаш ҳамда соҳага оид бошқа масалаларда тизимли муаммо ва камчиликлар борлигини кўрсатгани таъкидланди. 

Хусусан, қонунчиликда кўра сафарбарлик чақируви резервидаги хизматга олиниб, ойлик ҳарбий йиғинларни ўтаган (Ватанга қасамёд қабул қилган) фуқаролар 27 ёшга тўлгунларига қадар мақсадсиз равишда СЧР хизматчилари ҳарбий ҳисобида турмоқда. Натижада Қуролли Кучлар сафида ҳарбий хизматни ўтаган резервчилар билан ўз вақтида ҳарбий тузилмаларни керакли мутахассислар билан сифатли бутлаш имконини кечиктирилишига сабаб бўлмоқда. 

Шунингдек, Қонунининг 27-моддасида ҳарбий хизматнинг бошланиши ва тугаши белгиланган бўлса-да, ушбу моддада сафарбарлик чақируви резервидаги ҳарбий хизматнинг бошланиши ва тугаши келтирилмаган. 

Бундан ташқари, ўрганиш жараёнида СЧР батальонлари ўқув гуруҳларига ўртача 36-42 нафардан СЧР хизматчилари ва ҳар бир гуруҳга 1 нафардан гуруҳ командири (офицер) бириктирилган. Бу эса Батальон гуруҳи командирлари таътил, хизмат сафари, даволаниш ва суткалик нарядга тайинланганда СЧР хизматчиларига машғулотларни ўтишда машғулот раҳбарлари етишмаслигига сабаб бўлмоқда. 

Шу жиҳатдан Олий Мажлис Сенати Мудофаа ва хавфсизлик масалалари қўмитасининг тегишли қарори қабул қилинди. 

 

 

 

Шарҳлар