Душанба куни АҚШда COVID-19 коронавирусига қарши оммавий эмлаш кампанияси бошланди, дея хабар беради INTERFAX.RU АҚШ ОАВларига таяниб.
Шифокорлар FDA томонидан тасдиқланган Pfizer / BioNTech вакцинасидан фойдаланадилар. Қўшма Штатларда биринчи бўлиб вакцинани Нью-Йорклик тиббиёт ходими олган. АҚШда дори-дармонларни тарқатиш учун масъул бўлган генерал Густав Перна аввалроқ 3 миллион дозали вакцинанинг дам олиш кунлари мамлакат бўйлаб махсус жиҳозланган марказларга етказиб берилишини айтган.
Мичиган штатига карашли Каламазоо шаҳридаги Pfizer ишлаб чиқариш корхонасининг вакцинали юк машиналари мамлакатнинг турли ҳудудларига йўл олган. АҚШ Президенти Доналд Трамп томонидан шанба куни кечқурун Твиттерга жойлаштирилган видеомурожаатда кимлар биринчи галда эмланишини ҳар бир штат губернаторлари белгилаши айтилган.
"Биз биринчилардан бўлиб кексалар, коронавирусга қарши курашда олдинги сафда турган соғлиқни сақлаш ходимлари бўлишни хоҳлаймиз. Бу ўлим ва касалхонага ётқизиш сонини тез ва тубдан камайтиради", - деган Трамп.
Қўшма Штатлар Буюк Британия ва Канададан кейин оммавий эмлаш учун Pfizer / BioNTech дан фойдаланишни маъқуллаган учинчи мамлакат бўлди. Аввалроқ, компаниялар ушбу препаратнинг 95 фоиз самарадорлигини клиник синовларнинг учинчи - охирги босқичида эълон қилишган эди.
Worldometers статистикасига кўра, АҚШда пандемия бошланганидан бери жами 16,7 миллиондан ортиқ коронавирус инфекцияси аниқланган, 306 мингдан ортиқ бемор вафот этган ва 9,7 миллионга яқин одам соғайган.
