Буюк Британияда ва Жанубий Африкада аниқланган коронавирус мутациялари касалликнинг оғирлигига таъсир қилмайди, аммо тезроқ юқиши мумкин. Бу ҳақда Жаҳон соғлиқни сақлаш ташкилоти тадқиқотчилари таъкидладилар, дея ёзмоқда ntv.ru.
“Яхши хабар шундаки, ушбу вариантларнинг ҳеч бири оғирроқ касаллик келтириб чиқармайди. Трансмиссия кучайиши мумкин. Аммо бу мавжуд ҳимоя чоралари ишламайди дегани эмас. Улар ҳақиқатдан ҳам ишлайди", дейди ЖССТ Фавқулодда вазиятлар бўлими техник гуруҳи раҳбари Мария ван Керкхове.
Бутунжаҳон соғлиқни сақлаш ташкилоти Британия ва Жанубий Африка олимлари билан коронавирус мутациялари бўйича ҳамкорликни давом эттирмоқда. ЖССТ Британиялик юқумли касалликлар бўйича мутахассислар деярли реал вақтда коронавируснинг янги тури тўғрисида маълумот беришларини таъкидладилар. ЖССТ шунингдек, аллақачон ишлаб чиқарилган COVID-19 га қарши эмлашлар коронавирус инфекциясининг янги турларидан ҳимоя қилишда ҳам самарали эканлигини таъкидлади.
"Ҳозиргача ишлаб чиқилган вакциналар ушбу коронавирус турларига қарши самарали бўлмайди деган аниқ кўрсатма йўқ. Изланишлар давом этмоқда. Ҳозиргача далиллар ушбу вакциналар ҳали ҳам самарали эканлигини кўрсатмоқда", дейди ЖССТнинг Фавқулодда вазиятлар бўйича директори Майкл Райан.
ЖССТ мутахассисларининг таъкидлашларича, янги штаммлар илгари муомалада бўлганлардан "тубдан фарқ қилмайди". Шунинг учун инфекция тарқалишининг олдини олиш бўйича илгари тавсия этилган чора-тадбирлар ҳали ҳам долзарбдир: масофани сақлаш, биноларни тез-тез шамоллатиш, ниқоб кийиш, ижтимоий алоқалар сонини камайтириш.
Эслатиб ўтамиз, аввалроқ ЖССТ Буюк Британияда аниқланган коронавирус мутацияси 40 дан ортиқ мамлакат ва ҳудудларга тарқалгани ҳақида хабар берган эди. Ва "501Y.V2" номи билан танилган Жанубий Африкалик штамм 7 мамлакатга тарқалди. Буюк Британияда учинчи карантин жорий этилганлиги эълон қилинди.
