my5
Sevimli

Нукус гарнизонидаги Маънавият ва маърифат маркази мухташам кўринишга эга бўлди

ЖАМИЯТ 14.01.2021, 13:35
Нукус гарнизонидаги Маънавият ва маърифат маркази мухташам кўринишга эга бўлди

Ўзбекистон Республикаси Қуролли Кучлари ташкил топганининг 29 йиллиги ҳамда Ватан ҳимоячилари байрами арафасида Нукус гарнизонидаги Маънавият ва маърифат маркази биноси капитал таъмирдан чиқарилиб, фойдаланишга топширилди. Бу ҳақда Шимоли-ғарбий ҳарбий округ матбуот хизмати хабар бермоқда.

Шу муносабат билан ўтказилган тантанада Қорақалпоғистон Республикаси Жўқорғи Кенгеси раиси Мурат Камалов ҳамда Вазирлар Кенгаши раиси Кахрамон Сариев, Шимоли-ғарбий ҳарбий округ қўшинлари қўмондони полковник Фарҳоджон Шерматов, Қуролли кучлар фахрийлари, кенг жамоатчилик ва ҳарбий хизматчилар иштирок этди.

Таъкидлаш жоизки, ҳарбий хизматчилар ва улар оила аъзоларининг маънавий-маърифий билимларини мустаҳкамлаш, уларда ватанпарварлик, Ватанга муҳаббат, миллий истиқлол ғояларига содиқлик, Қуролли Кучларга ҳурмат туйғусини шакллантириш борасида Президентимиз томонидан 2018 йил 4 августда қабул қилинган “Ўзбекистон Республикаси Қуролли Кучлари ҳарбий хизматчиларининг маънавий-маърифий савиясини ошириш тизимини тубдан такомиллаштириш тўғрисида”ги қарори том маънода дастуриламал бўлмоқда. Қарорга мувофиқ ҳарбий хизматчиларнинг маънавий савияси ва интеллектуал салоҳиятини юксалтириш ҳамда бой маданиятимиз, азалий қадриятлар ва анъаналаримизга асосланган дунёқарашини шакллантиришга йўналтирилган ягона тизим яратилди. Ўзбекистон Республикаси Мудофаа вазирлиги тизимидаги мавжуд Офицерлар уйлари Маънавият ва маърифат марказларига, ҳарбий қисм ва муассасалардаги клублар эса Маданият марказларига айлантирилди. Президент ташаббуси билан Мудофаа вазирлигининг Маънавият ва маърифат маркази ҳузурида «Турон» давлат ҳарбий театрининг ташкил этилиши эса ўзига хос тарихий воқеа  бўлди.

Тадбирда сўзга чиққан меҳмонлар ҳам муҳташам кўриниш касб этган ушбу маскан эндиликда ҳарбий хизматчилар ва уларнинг оила аъзолари, шунингдек аҳолининг маънавиятини, маърифатини юксалтириб, маданий ҳордиқ ишларини юқори даражада ташкил этишга хизмат қилишига ишонч билдирди.

Меҳмонлар янгиланган Маънавият ва маърифат биноси бўйлаб саёҳат қилди.

Яқинда амалга оширилган капитал таъмир ва реконструкция ушбу Маънавият ва маърифат марказига “иккинчи ҳаёт” бағишлади, бино замонавий ва шинам кўриниш, кўркам ва муҳташам қиёфа касб этди 

Бино ташқи фасадининг тўртдан уч қисмининг юзасига ишлов берилиб, миллий дизайн асосида безатилди. Марказ биринчи қаватининг фойесида деворнинг 2х15 м. ҳажмига моҳир ҳайкалтарош Казакбай Хожамуратов томонидан ишланган “Карвон йўлларига туташ саҳро” номли барельеф жойлаштирилган бўлиб, ушбу санъат асари Қорақалпоғистон халқининг бой тарихи, маданияти ва санъати, ўзига хос ва бетакрор табиати, ўсимликлар ва ҳайвонот дунёсини ўзида акс эттиради. Ундаги балиқчилик билан шуғулланаётган икки нафар эркак ва Орол денгизи ёқасидаги болакай образи балиқчилик қорақалпоқлар учун авлоддан-авлодга ўтиб келаётган ота мерос касб эканлигига ишора қилади. Чағалай қушлар эркинлик ва фаровонлик, балиқлар эса қут-барака тимсоли сифатида асарнинг мазмунини бойитган. Мазкур асарда Чилпиқ, Говурқалъа, Миздакхон каби тарихий объектлар ҳам булутлар орасида кўзга ташланиб  туради. Бу эса Қорақалпоғистон тарихи жуда узоқ даврларни ўз ичига қамраб олганини англатади. Бир сўз билан айтганда барельеф санъати орқали яратилган ушбу асар жаннатмакон Қорақалпоғистон ва қорақалпоғистонликлар ҳақида сўйлайди. 

Таъмирлаш ишлари натижасида 600 ўринга мўлжалланган концертлар залида саҳна, ўриндиқлар ҳамда ердаги ва деворлардаги қопламалар тўлалигича янгиланиб, замонавийлаштирилди. Саҳна ичкарисига ўрнатилган 9х5 м ҳажмдаги LED-панелли экран, турли рангларда мавжланадиган саҳна ёритиш чироқлари, қорақалпоқ халқ миллий нақшлари билан безак берилган саҳна ва томошалар зали эндиликда ҳар қандай тадбирни сифатли ўтказиш, ҳарбий хизматчилар ва улар оила аъзоларининг мазмунли дам олишини таъминлаш учун қўшимча қулайлик яратиб беради. Зал тепа қисмининг маразида жойлашган ва қорақалпоқ ўтовларининг энг асосий элементи бўлган “Шаңарақ”, яъни “оила” маъносини англатувчи миллий рамзи бу ердаги ҳарбий хизматчилар ҳам жипслик ва бирдамликда, бир оила бўлиб яшаётганини билдиради. 

Маънавият ва маърифат марказида яратилган яна бир объект алоҳида диққатга сазовор. Зеро Мудофаа вазирлиги ҳарбий округлари ичида биринчи “Округ тарих музейи” айнан шу ерда бунёд этилган. 1,5 минг экспонатдан иборат бўлган музей экспозициясидан Қорақалпоғистон Республикаси ва Хоразм вилояти тарихи, урф-одат ва анъаналари, ҳудудий бўлиниши, табиий ва сунъий бойликлари, миллий либослари, қадимий асори-атиқалар билан бирга бу икки заминда етишиб чиққан Иккинчи жаҳон уруши қаҳрамонлари, урушга кўшилган ҳиссаси ва 1999 йил ташкил топган Шимоли-ғарбий ҳарбий округга шу давр ичида раҳбарлик қилган қўмондонлар ҳақидаги маълумотлар, ҳарбий хизматчиларнинг республика ва халқаро ареналарда қўлга киритган ютуқлари, ўқ-дори намуналари, уруш йилларида фойдаланилган ҳарбий аслаҳалар ўрин олган. Электрон инфокиосклар оқали Иккинчи жаҳон урушида юртдошларимиз қўшган ҳиссаси акс этган видеолавҳалар билан ҳам танишиш мумкин. Замонавий дизайн ва ўзгача дид билан яратилган бу музей Қуролли Кучларимиз тарихининг янги саҳифаларидан жой олиши шубҳасиз.

Турли зиддиятлар кучайиб бораётган бугунги дунё манзараларида ёшларимизнинг маънавий иммунитетини кучайтириш, уларнинг бўш вақтини мазмунли ўтказиш ҳар қачонгидан ҳам долзарброқ эканини замоннинг ўзи кўрсатиб турибди.

Ўсиб камолга етаётган ёшларимизга бўлган эътиборни янада кучайтириш, уларни маданият, санъат, жисмоний тарбия ва спортга кенг жалб этиш, ёшларда ахборот технологияларидан фойдаланиш кўникмаларини шакллантириш, юртимиз ёшлари ўртасида китобхонликни тарғиб қилиш, хотин-қизлар бандлигини ошириш масалалари қаратиб 2019 йилда Президентимиз томонидан илгари сурилган 5 та муҳим ташаббус ижросини таъминлаш мақсадида янгиланган Маънавият ва маърифат марказининг иккинчи қаватида ҳарбий хизматчиларнинг фарзандлари учун инглиз ва рус тиллари, математика, ментал арифметика, компьютер саводхонлиги, шахмат-шашка, рақс ва бадиий гимнастика тўгаракларининг хона ва заллари энг сўнгги услубда жиҳозланди. 

Юрт ҳимоячилари ва уларнинг оила аъзоларига қўшимча қулайликлар яратиш мақсадида барпо этилган ҳамда замонавий тренажёр ва спорт анжомлари билан бутланган фитнес ҳамда тренажёр заллари эндиликда соғлом турмуш тарзини тарғиб этиш ва соғликни мустаҳкамлаб туриш учун хизмат қилади. 

Тўгарак аъзолари ва спорт заллари қатнашувчилари эҳтиёжи учун марказда замонавий жиҳозларга эга бўлган 9 та санитар тизим ва 3 та душ хонаси мавжуд.

Мудофаа вазирлиги қўшинлари билан реал вақт мезонида видеоселектор тарзида мажлис ва йиғилишларни, халқаро тоифадаги учрашув ва давра суҳбатларни видеоконференц алоқа тизими ёрдамида ўтказиш имконига эга бўлган 70 ўринли катта мажлислар зали ҳамда 30 ўринли кичик мажлислар зали округ қўшинларининг бошқарув тизимини янги босқичга кўтаришга қўшимча имкон яратади.

Ҳарбий округ қўшинларида рўй бераётган энг сўнгги янгиликларни тезкорлик билан телерадиоканаллар, интернет ва босма нашрлари, ижтимоий тармоқ ва месенжерлар орқали кенг ёритиш, оммавий ахборот воситалари билан узвий ҳамкорликни ушлаб туришга хизмат кўрсатаётган округ матбуот хизмати учун ҳам мазкур мажмуада алоҳида жой ажратилган. Таъмирлаш ишлари натижасида ҳарбий округнинг блиц-интервью, олинган видеотасвирларни монтаж қилиш, лавҳа ва хабарларни тайёрлаш ва узатиш ҳамда овоз ёзиш имконига эга бўлган янги медиа студияси барпо этилди.

Маънавият ва маърифат марказига ташриф буюрган меҳмонлар, санъат аҳли ва ижодкорларни кутиб олишга хизмат қилувчи 3 та меҳмонларни кутиш зали ҳамда эркаклар ва аёлларга хизмат кўрсатувчи гўзаллик салонлари яратилди.

Бир сўз билан айтганда мана шундай ўзгаришлар, янгиланишлар ҳарбий хизматга бўлган юксак эътибордан далолатдир.

 

Шарҳлар

Кун мавзуси: коронавирус
Об-ҳаво: Ташкент
+10° дымка
Валюта курси
10473.20
USD 23.76
12796.16
EUR 34.26
141.29
RUB 0.84