Россия президенти Владимир Путин коронавирусга қарши эмланди ва ўзини яхши ҳис қилмоқда. Бу ҳақда Россия раҳбарининг матбуот котиби Дмитрий Песковга таяниб, ТАСС хабар берди.
"Путин коронавирусга қарши эмланди. Ўзини яхши ҳис қилмоқда, - деди Кремль вакили. - Эртага у тўлиқ иш кунини ўтказади."
Кремль давлат раҳбари Россиянинг учта вакцинасидан қайси бирини танлаганига аниқлик киритмади. Тушунтирилишича, Кремль атайлаб президентга қайси вакцина билан эмланишини кўрсатмайди ва "Россиянинг барча учта эмлашлари мутлақо ишончли ва самарали" эканлигини таъкидлайди. Россия раҳбарининг эмлаши бошқа мамлакатлардаги баъзи сиёсатчилар сингари оммавий тадбир эмас эди. Сешанба куни журналистларга бунинг сабабларини Кремль вакили қуйидагича изоҳлади: "Камералар остида эмлаш масаласига келсак, у [Путин] буни ёқтирмайди".
2020 йил 17 декабрь куни бўлиб ўтган катта матбуот анжуманида Россия президенти, албатта, иложи борича COVIDга қарши вакцина олишини айтганди.
