Кундалик ҳаётда содир бўлиши мумкин бўлган фавқулодда вазиятларни бартараф этиш, хусусан ёнғинларни сифатли, тезкор ҳамда кам талофат билан ўчириш уучун зарур бўлган малакали ходимларни тайёрлашда ёнғин-қутқарув спорти алоҳида аҳамият касб этади.
Ўзбекистон Республикаси ФВВ Академиясида мазкур спорт тури бўйича яхши натижаларни қўлга киритган мураббий ва курсантлар талайгина. Албатта, бу эришилган натижалар Вазирлик раҳбариятининг спортга бўлган эътибори ҳамда Академия шахсий таркибининг касбига бўлган садоқати намунасидир.
Беларусь Республикаси ФВВ Фуқаро муҳофазаси университетининг таклифига асосан подполковник Умиджон Болибеков раҳбарлигидаги Ўзбекистон Республикаси ФВВ Академиясининг делегацияси (терма жамоа) жорий йилнинг 31 март – 4 апрель кунлари мазкур Университетда “Таълим муассасаларида ёнғин-қутқарув спортининг ривожланиши” мавзусида ўтказилган I Халқаро илмий-амалий конференциясида иштирок этди. Илмий-амалий конференцияни
Беларусь Республикаси Ёнғин ўчирувчилар ва қутқарувчилар халқаро спорт Федерациясининг вице-президенти, Ёнғин-қутқарув спорти Федерациясининг Ижро қўмитаси раиси Ващенко Владимир Александрович киришсўзи билан очиб берди.
Фуқаро муҳофазаси университети бошлиғи полковник техника фанлари номзоди, доцент Полевода Иван Иванович меҳмонларнинг ташрифи билан қутлаб,“Таълим муассасаларида ёнғин-қутқарув спортини ривожлантириш” мавзусида нутқ сўзлади.
Конференциянинг кун тартибига асосан Ўзбекистон Республикаси ФВВ Академияси Ўқув ёнғин-қутқарув қисми смена бошлиғи подполковник Умиджон Болибеков “Таълим муассасаларида ёнғин-қутқарув спортини ташкил этишнинг назарий асослари” мавзусида ўз маърузаси билан чиқиш қилди.
Шунингдек, конференцияда Россия Федерацияси ФВВ, Санкт-Петербург Давлат ёнғинга қарши хизмати университети Ёнғин, авария-қутқарув техникаси ва автомобиль хўжалиги кафедрасининг профессори, техника фанлари доктори В.Ложкин, Беларусь Республикаси ФВВ Фуқаро муҳофазаси университети ходимлари Ю.Дубовик, И.Радьков ва Беларусь давлат жисмоний маданият университети Қайта тайёрлаш ва малака ошириш институти ходими А.Майсейчиклар ҳам ўз нутқлари билан иштирок этдилар.
Қизиқарли томони мазкур конференция доирасида илк бор янги “Ёнғин-қутқарув спорти” номи остида ташкил этилаётган Халқаро турнир ташкил этилди. Турнирда Беларусь Республикаси ФВВ Фуқаро муҳофазаси университети ҳамда Ўзбекистон Республикаси ФВВ Академиясининг курсантларидан иборат терма жамоалар “Ёнғин-қутқарув спорти”нинг жами 4 та тури - “Ишғол қилиш нарвони ёрдамида Ўқув минорасининг 2 ва 4-қаватларига кўтарилиш”, “4х100 метр масофада эстафетали югуриш”, “100 метр масофага тўсиқлар оша югуриш”, “Жаноговар ёйилиш” бўйича беллашдилар.
Беларусь Республикаси ФВВ Фуқаро муҳофазаси университетида “Ёнғин-қутқарув спорти” бўйича ташкил этилган Халқаро турнирда Ўзбекистон Республикаси ФВВ Академиясининг терма жамоаси умумжамоа ҳисобида 3 – ўринни эгаллади.
Беларусь Республикаси ФВВ Фуқаро муҳофазаси университети раҳбариятининг алоҳида тадбирлар режасига асосан Ўзбекистон Республикаси ФВВ Академиясидан ташриф буюрган курсантларга университетда курсант ва тингловчиларнинг таълим олишлари, спорт билан шуғулланишлари ҳамда маданий ҳордиқ чиқаришлари учун яратилган шарт-шароитлар тўғрисида маълумот бериш учун университет бўйлаб экскурция ташкил этди. Экскурцияга университет бошлиғининг биринчи ўринбосари ички хизмат полковниги Игорь Радьков раҳбарлик қилди. Шунингдек, Университетнинг Халқаро ҳамкорлик сектори бошлиғи катта лейтенант Николай Олейсюк Академия делегациясини Беларусь Республикаси ФВВ Хавфсизлик марказининг фаолияти, марказда фавқулодда вазиятларни бартараф этиш юзасидан ташкил этилган симуляторларнинг фаолияти билан яқиндан таништирди.
Ўтказилган дўстона мусобақа ва самимий мулоқотлар курсантлар қалбида чуқур из қолдириб, касбига бўлган садоқатини ошириши, келгусида фавқулодда вазиятларни баратараф этишга, жисмоний ва юридик шахсларнинг ҳаётини, соғлиғини ва мол-мулкини турли табиий ҳамда техноген тусдаги офатлардан асрашга хизмат қилиши шубҳасиз, албатта.
Мусобақа якунида Беларусь Республикаси ФВВ Фуқаро муҳофазаси университети раҳбарияти 1, 2 ва 3-ўринларни эгаллаган жамоаларга диплом, медал ва эсдалик совғаларини топширди.
Соҳиб СУЛТОНОВ,
Академия Халқаро ҳамкорлик
бўлинмаси бошлиғи, майор.
