Ўзбекистон мусулмонлари идораси раиси, муфтий Усмонхон Aлимов 71 ёшида вафот этди. Бу ҳақда Мубашшир Aҳмад хабар берди.
Усмонхон Aлимов Самарқанд вилояти Иштихон туманида таваллуд топган. 1982—1983-йилларда Бухоро шаҳридаги Мир Aраб мадрасасида, 1983—1987-йилларда Имом Бухорий номидаги Тошкент ислом институтида, 1989—1990-йилларда эса Марокашнинг “Каравийн” дорилфунунида таҳсил олган.
Усмонхон Aлимов Паяриқ туманида жойлашган Имом Бухорий номидаги жоме масжидида 1980—1982-йилларда имом-ноиб, 1987—1989 йилларда, сўнгра яна 1990—2006-йиллар мобайнида ушбу масжиднинг имом-хатиби сифатида фаолият юритган.
2000—2006-йилларда Ўзбекистон мусулмонлари идорасининг Самарқанд вилояти вакили, бош имом-хатиби сифатида ишлаган. 2006-йилдан то ҳозирга қадар Ўзбекистон мусулмонлари идораси раиси, муфтий лавозимида ишлаб келаётган эди.
Маълумот ўрнида, муфтий сўнгги вақтларда Москвада даволанаётган эди — у ўпка ва қон-томир касалликлари, хусусан ўпка пневмонияси бўйича муолажалар олаётган эди.
