Президент Шавкат Мирзиёев Қорақалпоғистон Республикасига ташрифини якунлаб, Хоразмни кўздан кечирмоқда. "Даракчи" мухбири Сардорбек Раҳмонқуловнинг хабар беришича, Президент вилоятдаги тўртта долзарб муаммони бирма-бир санаб ўтган.
" – Бугунги кунда Хоразмдаги энг катта муаммолардан бири – 80 мингдан зиёд аҳоли бандлигини таъминлашимиз керак. Шунингдек, меҳнат бозорига ҳар йили 30 минг нафар ёшлар кириб келмоқда. Айниқса, бу масала Қўшкўпир, Янгиариқ, Янгибозор туманларида ўта долзарб.
Иккинчи муҳим масала – аҳолининг ҳаёт даражаси ва инфратузилмани яхшилаш. Вилоятда кўплаб оилаларнинг яшаш шароитини яхшилашга эҳтиёж бор. Биргина Хонқада 6 минг оила (18 фоизи) уй-жойга муҳтож. Хазорасп, Хива, Шовот, Янгиариқ аҳолисининг ичимлик сув таъминоти паст даражада қолмоқда.
Барча туманларда йўл-транспорт, ижтимоий ва муҳандислик инфратузилмасини яхшилаш талаб этилади.
Учинчи жиддий муаммо – 542 минг нафар ёки 30 фоиз аҳолининг сурункали касаллиги бор. Урганч шаҳри, Хазорасп, Қўшкўпирда – юрак қон-томир, Хива, Хазорасп, Хонқа туманларида – қандли диабет, Шовот, Хонқа, Хазораспда – нафас йўллари касалликлари кўп учрамоқда.
Тўртинчи долзарб масала – таълим соҳасидаги муаммолар вилоят ёшларининг салоҳиятини ва аниқ фанларга интилишини рўёбга чиқаришга тўсиқ бўлмоқда.
Вилоятда 30 та мактабда ўқиш 2–3 сменада ташкил этилмоқда. Келгуси 5 йилда ўқувчилар сони 35 мингтага кўпайиб, мактабларга юклама янада ошади", – деган давлат раҳбари.
