Қашқадарё вилоятида ишсизлар ва ёшларни касб-ҳунарга ўқитишнинг мутлақо янги тизими жорий этилади. Бунда нефт ва газ соҳасининг вилоятда фаолият кўрсатаётган 5 та йирик корхона мутахассислари тажрибасидан фойдаланилади.
“Даракчи” мухбири Сардорбек Раҳмонқуловнинг Шавкат Мирзиёев иштирокидаги йиғилишдан маълум қилишича, энди Қашқадарё вилоятидаги барча касб-ҳунар марказлари иккита энг йирик бўлган Шўртан газ кимё мажмуаси ва Муборак газни қайта ишлаш заводига бириктирилади.
Бунда корхона мутахассислари:
- талаб юқори бўлган мутахассисларни вилоят бўйича тайёрлаш режаларини белгилайди;
- ўқув дастурлар ва методикасини амалиётдан келиб чиқиб, қайта кўриб чиқади;
- ҳар бир ёш ўқувчи ўқиш жараёнида ўз мутахассисликлари бўйича амалиёт ўтишини ташкил этади.
Янги очилган мономарказда Ай-Ти, мураккаб ускуна оператори ва бошқа юқори технологик мутахассисликлар ўргатилади.
Шунингдек, ҳар бир туманда камида бештадан, жами вилоятда 90 та касбга ўқитиш масканларида туманнинг ихтисослигидан келиб чиқиб ёшлар ва ишсизлар касбга бепул ўқитилади.
" – Мен “Ўзбекнефтгаз” АЖ Бошқарув раиси Меҳриддин Абдуллаев билан батафсил гаплашдим. Қашқадарёда бу жамият иштирокида янгича тизим йўлга қўямиз. Бунда нефт ва газ соҳасининг вилоятда фаолият кўрсатаётган 5 та йирик корхона мутахассислари тажрибасидан фойдаланамиз.
Шу тизим орқали, келгуси беш йилда 150 мингдан зиёд ишсизлар ва ёшлар тадбиркорлик ва касб-ҳунарга ўқитилади. Бундан ташқари, Шаҳрисабз, Китоб, Касби ҳамда Қарши шаҳрида ҳунармандчилик марказлари қурилиб, 15 мингдан зиёд ёшлар шогирдликка олинади," – деди Шавкат Мирзиёев.
