Ўзбекистонда ревакцинацияга расман рухсат берилганми? "Спутник" етишмаган тақдирда бошқа вакциналарни олиш мумкинми?
Ушбу савол билан Инновацион ривожланиш вазирлиги Ахборот хизмати Коронавирусга қарши курашиш штаби аъзоси Нурмат Отабековга юзланди.
— Бунда аввало бир нарсани тушунишимиз керак, вакцинация нима, ревакцинация нима? Биз бирон бир касалликка қарши эмлаш жараёнини бошлаган ва якунлаган бўлсак, биз вакцинация қилинганмиз, эмланганмиз деган тушунчага эга бўламиз.
Қачонки касаллик бир неча маротаба эмлашни талаб қиладиган бўлса, ревакцинация деган ибора қўлланилади. Лекин тиббиётда биринчи маротаба олган вакцинани вакцинация, кейинги эмлашни эса ревакцинация деб ҳам юритилади. Шундай экан қачонки одам у ёки бу вакцина билан ҳозирги даврдаги талабга асосан 1-2 ёки 3 маротаба эмланса, шу вакцинани олиб бўлган бўлса, демак у тўлиқ эмланган ҳисобланади.
Бир вакцина билан эмланиб орадан бироз муддат ўтгандан кейин бошқа вакцина билан эмланиш ҳақида ҳали ҳеч қанақа кўрсатма мавжуд эмас. Жаҳон соғлиқни сақлаш ташкилоти ҳам бирон бир кўрсатма бергани йўқ.
Яна битта жиҳат, бир вакцина билан эмланиб, кейинги босқичларни бошқа вакциналар билан давом эттириш ҳақида ҳам ҳали тартиб ишлаб чиқилмаган. Бу ҳолат дунё тиббиётида гибрид вакцинация дейилади.
Ҳозир ЖССТ бу ҳақида ўйлаяпти. Негаки, вакциналарнинг таъминотидаги узилишлар муаммоларнинг юзага келишига сабаб бўляпти. Шу нуқтаи назардан ҳадемай бу каби гибрид вакцинацияга ҳам рухсат берилса ажабмас. Кутилаётган рухсатга асосан қайси вакцинани қандай кетма-кетлик ва оралиқда, қай йўсинда эмлаш мумкинлиги ҳақида ҳужжат пайдо бўладиган бўлса, биз буни кенг жамоатчиликка маълум қиламиз ва барча тиббиёт ходимларига етказамиз.
