my5
Sevimli

Россия Олмалиқда мисни қайта ишлаш фабрикаси қуриш учун 712 млн евро ажратади

ДУНЁ 24.11.2021, 17:29
Россия Олмалиқда мисни қайта ишлаш фабрикаси қуриш учун 712 млн евро ажратади

Фабриканинг қурилиш қиймати $2 млрд.ни ташкил этади.

Россия давлат тараққиёт корпорацияси (ВЕБ РФ) Ўзбекистондаги энг йирик мисни қайта ишлаш фабрикаси учун Россия ускуналарини етказиб беришни молиялаштиради. Фабрика қуввати бўйича МДҲ давлатлари орасида ягона бўлади, деб хабар берди ВЕБ матбуот хизмати.

ВЕБ.РФ ва “Олмалиқ кон-металлургия комбинати” АЖ (ОКМК) ўртасида кредит шартномаси Ўзбекистон президенти Шавкат Мирзиёевнинг Россияга ташрифи арафасида имзоланган.

ВЕБ РФ компаниясининг 712 млн евро миқдоридаги кредити Олмалиқда йилига 60 млн тонна рудани қайта ишлаш қувватига эга мисни қайта ишлаш фабрикаси мажмуаси қурилишини молиялаштиришга йўналтирилади.

Лойиҳа Ёшлик И конини ўзлаштириш ва кейинчалик уни мавжуд Қалмоққир кони билан бирлаштиришни назарда тутади. Қўшма кон мис рудаси захиралари бўйича дунёдаги энг йирик конлардан бирига айланади. ОКМК маълумотларига кўра, МДҲ ҳудудида биринчи марта бундай қувватга эга фабрикани қуриш режалаштирилган. Уни амалга ошириш учун Чили ва Перудаги мис карерларида шунга ўхшаш тармоқлар ўрганилди.

Маблағлар лойиҳа доирасида Россия ускуналари ва хизматлари учун ҳақ тўлашга, шунингдек, уни амалга ошириш билан боғлиқ харажатларнинг бир қисмини қоплашга йўналтирилади.

Лойиҳанинг иккинчи босқичини ҳисобга олган ҳолда, ОКМК рудани қайта ишлаш ҳажмини йилига 160 млн тоннага етказишни режалаштирмоқда, бу эса 2028-йилга бориб катодли мис ишлаб чиқаришни йилига 400 минг тоннагача ошириш имконини беради. Бундан ташқари, ОКМК 2028-йилгача йилига 270 тонна кумуш ва 50 тонна олтин қазиб олади.

Фабриканинг қурилиш қиймати $2 млрд ни ташкил этади. Лойиҳани молиялаштиришда Газпромбанк ва ЭКСАР ҳам иштирок этмоқда. Аввалроқ, ВЕБ РФ ОКМКга тоғ-кон самосваллари ва тоғ-кон ускуналарини сотиб олиш учун кредитлар ажратганди.

Шарҳлар

Кун мавзуси: коронавирус
Об-ҳаво: Ташкент
Валюта курси