2022 йилнинг январь, февраль ва март ойларида эмланганлик сертификатини олган фуқаролар ўртасида қимматбаҳо ютуқли ўйин (бош соврин — автомобиль) ташкил этилади. Бу ҳақда Соғлиқни сақлаш вазирлиги Матбуот хизмати хабар қилди.
Шунингдек, вазирлик коронавирус билан боғлиқ вазиятн ва эмлаш чора-тадбирлари ҳақида маълум қилди.
Қайд этилишича, сўнгги вақтларда бутун дунёда янада кенг тарқалаётган коронавирус инфекциясининг навбатдаги тўлқини юртимизни ҳам четлаб ўтмади. Касалликнинг “омикрон” штамми мамлакатимизда ҳам аниқланди.
Жаҳон соғлиқни сақлаш ташкилоти хулосасига кўра, эмлаш коронавирус касаллигини олдини олишнинг ягона йўлидир. Жумладан, COVID-19нинг турли штаммлари, хусусан, тез тарқалувчи “омикрон”га қарши курашда ҳам мавжуд вакциналар ижобий натижа бермокда. Таҳлиллар вакцинация даражаси юқори бўлган давлатларда ушбу штамм туфайли касалланиш даражаси паст ва енгил ўтаётганини кўрсатган.
