1 март куни Тошкент шаҳар ҳокими Жаҳонгир Ортиқхўжаев Туркия Республикасининг Ўзбекистондаги фавқулодда ва мухтор Элчиси Олган Бекар билан учрашди. Бу ҳақда ҳокимлик қайд этмоқда.
Элчи Ж.Ортиқўжаевга қабул учун миннатдорлик билдириб, ўзбек-турк муносабатлари жадал ривожланаётганини билдирган. Шунингдек, март ойининг охирида бўлиб ўтадиган II-стратегик ҳамкорлик бўйича саммит доирасида Туркия президенти Ражаб Тойип Эрдоған Ўзбекистонга ташриф буюриши кутилаётганини маълум қилинган.
Шу билан бирга, тарафлар Турк мактабини кенгайтириш учун ер майдонини ажратиш ва Туркиянинг биринчи президенти Мустафо Камол Отатурк номини Тошкент кўчаларидан бирига бериш ҳамда Тошкентда қурилиш билан шуғулланаётган турк компанияларининг масалаларини муҳокама этишган.
"Жаҳонгир Ортиқхўжаев ушбу масалаларнинг ечимида имкон қадар кўмак беришга тайёрлигини билдирди. Олган Бекар ҳам, ўз навбатида, ҳамкорлик алоқаларини ривожлантириш учун бор имкониятларни ишга солишни ваъда берди",-дейилади хабарда.
