Хонанда, актриса, икки фарзанднинг онаси, суюкли ёр ва чаққонгина келин – Мадина МУМТОЗ билан “Суғдиёна” газетаси ижодкори боғланиб, ижоди ҳақида суҳбатлашмади! Бу сафар у ноодатий саволлар нишонида! Қани кўрамиз, берилган вазифани қай даражада уддалар экан.
– Ҳаётда қиёфадошингиз бўлиши мумкинми?
– Ҳа! «Зуҳрам»ни учратмаганман-у, аммо қайсидир жиҳатлари, эҳтимол ташқи кўриниши, юз тузилиши менга ўхшаш бўлганлар бор. Ўзим кўрганман!
– Опера, жаз, реп — қай бир йўналишда тажриба қилиб кўришингиз ёхуд дуэт ижроси амалга ошиши мумкин?
– Опера йўналишида тажриба қилиш ниятим йўқ эмас! Демак, опера!
– Таваккал қилиб...
– Билмасам... менимча, оила қураётганимизда, танлаган ёримизни қанчалик яхши билмайлик, танимайлик, қайсидир маънода таваккал қиламиз. Менда ҳам шундай бўлган.
– Кимларга нисбатан «аллергия»нгиз бор?
– Ўзига бино қўйган, атрофидаги одамларни қўл учида кўрсатадиган инсонларга нисбатан «аллергиям» кучли!
– Хаёлингизда тинимсиз айланадиган қўшиқ?
– ...кўпинча эрталаб бирор таронани тингласам, кун бўйи у хаёлимда айланаверади. Кўпчиликда шундай бўлса керак, ўйларимизни банд қиладиган қўшиқлар ўзгарувчан!
– Тасаввур қилинг, съёмкага кетаётиб йўлингизда адашдингиз. Телефонингизнинг қуввати тугаган, аксига олиб машина бензининг ҳам таги кўриниб қолаяпти, тағин денг, ёнингизда пулингиз йўқ! Нима қиласиз?
– Аввал машинани четроққа оламан, шу вақтда бирор ким ёнимдан ўтиб қолса, ундан ёрдам сўрайман, қўнғироқ қилиб олиш учун. Сўнг такси тўхтатаман-да, вазиятни тушунтириб манзилим томон ошиқаман. Хуллас, вазиятдан чиқиш йўлини топаман!
– Мадинанинг жаҳли чиққанда...
– Қорни очқаган бўлади (кулиб). Арзимаган нарсага ҳам аччиғим келиши мумкин, мабодо фикримни охирига етказиб беришимга қўйишмаса, жуда қаттиқ жаҳл қиламан.
– Қилаётган ишингиздан уяласиз, қачонки...
– Ёлғон аралашган бўлса... Эртами, кечми сирим фош бўлишидан чўчиб, қилаётган ишимдан уяламан. Лекин бунақанги вазиятлар сира бўлмаган. Ростгўйликни қадрлайман!
– Бир марта бўлса ҳам муштлашганмисиз?
– Мактаб пайтларим дугоналаримнинг ёнини олиб, тортишиб турар эдим. Лекин муштлашишгача бормаган.
– Пардозсиз кўчага чиқишингиз мумкинми?
– Ҳа ва бу ҳолат жуда кўп такрорланади.
– Турмуш ўртоғингизни кутиб олишда-чи?
– Баъзан пардозсиз бўлишим мумкин, лекин имкон қадар умр йўлдошимнинг ишдан қайтишига ясан-тусан қилволаман!
– Болалик хотираларингизни ёдга солувчи ифор қайси?
– Онам фойдаланган атир! Болалигимни эслаганимда айнан шу ифор димоғимга урилгандек бўлади.
– Телефонингиз туширилган сўнгги сурат?
– Маҳалладан чиқиб кетаверишда осмоннинг ярми булутли, ярми қуёш манзарасидан алланечук таъсирлангандим. Шу пейзажни суратга олган эканман.
– Ижодий сафарга кетаётганингизда ўзингиз билан олишингиз шарт бўлган 3 та нарса-буюм?
– Пул, уяли телефоним ва унинг қувватлагичи!
– Мадина Мумтоз ҳаётининг «саундтреки» қайси композиция?
– Ўзим ижро қилган «Бахтли бўл» қўшиғи!
Дилдора ЮСУФБЕКОВА суҳбатлашди.
