Габриель Гарсиа Маркеснинг “Ошкора қотиллик қиссаси” асарини ўқиганмисиз? Унда ака-ука Пабло ва Педро Викариолар Сантиаго Насарни ўлдириш учун жазм қилади. Бу ҳақида ҳаммага айтиб, кимдир бизни бу жиноятдан қайтарармикан, деб умид қилади. Аммо одамлар шунчалик беэътибор эдики, уларнинг бирортаси ака-укаларни тўхтатиб қолиш учун ҳеч нарса қилмайди. Натижада мана шундай ошкора қотиллик юз беради.
Ўтган йил ноябрь ойида Бахмал туманининг Қирққишлоқ қишлоғида юз берган қотиллик ҳам ана шу қиссани ёдга солади. Тўйда оддийгина келишмовчиликдан бошланган жанжал икки оилани барбод қилган қотиллик билан якун топди. Бунга базмда иштирок этган юзлаб одамларнинг бефарқлиги, лоқайдлиги сабаб бўлди. Кимнингдир акаси, кимнингдир укаси, кимнингдир яқин дўсти бўлган бу йигитларни вақтида тўхтатишганда, “менга нима” қабилида иш тутишмаганда, балки, бу тўй азага айланмаган бўларди.
Жиззах вилояти ички ишлар бошқармаси бошлиғи Р.Турсуновнинг ЎзА мухбирига маълум қилишича, шу муносабат билан келгусида тўй-тантаналарга оммавий тадбир сифатида қаралиши юзасидан кўрсатма юборилиб, ички ишлар органлари ва кенг жамоатчилик вакиллари томонидан тўлиқ назоратга олиниши белгиланди.
