Ўғлининг ичига кириб олган жинни ҳайдамоқчи бўлган нидерландиялик аёл, болага шафқатсизларча муносабатда бўлиш айби билан жиноий жавобгарликка тортилди, деб хабар берди lenta.ru нашри.
25 январь куни Нидерландиянинг Рурмонд шаҳар суди мазкур жиноят ишини кўриб чиқди. Бу мамлакат тарихидаги илк ҳодисадир. 9 ёшли ўғлининг ичига кириб олган жинни ҳайдамоқчи бўлган 39 ёшли, асли марокашлик бўлган аёл ўғлининг қўлини қизиб турган духовкага тиққан. Бундан ташқари, аёл боланинг қулоғига пахта тиқиб, эшитиш қобилиятига зарар етказган.
Аёл болани 2016 йилда асраб олган. Уни ҳимоя қилган адвокат бу шафқатсизларча муносабат эмас, балки болага ёрдам бериш мақсадида қилинган ҳаракатдир, деб аёлни оқлади. Судда иштирок этган криминал фалсафа фани профессор Йеруна тен Ворде (Jeroen ten Voorde) эса шафқатсизларча қилинган муносабатни ҳеч нима билан оқлаб бўлмаслигини маълум қилди.
