Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги директори ўринбосари Алишер Темиров бошчилигидаги делегацияси Франциянинг Страсбург шаҳрида бўлиб ўтган Соғлиқни сақлаш учун дори воситаларининг сифати бўйича Европа кенгаши директорати Европа фармакопеяси 163-сессиясида иштирок этди. Бу ҳақда Соғлиқни сақлаш вазирлиги Жамоатчилик билан алоқалар бўлими маълум қилди.
Маълумки, дори воситаларининг сифати инсон саломатлигини сақлаб қолиш ва узоқ умр кўриш даражасини оширишда муҳим омил саналади. Шу боис ушбу соҳани ривожлантириш жаҳон фармацевтика жамиятида бўлганимамлакатимизда ҳам устувор вазифалардан ҳисобланади.
Глобаллашув шароитида дори воситаларини стандартлаштириш ва сифат назорати бўйича умумий ёндашувлар зарурати мавжуд. Бунда турли мамлакатлар мутахассислари билан ахборот ва фикр алмашиш жуда муҳим. 2018 йил март ойида Европа Фармакопеяси Ўзбекистон Республикасини кузатувчи мақомида қабул қилиши ушбу йўналишда муҳим қадам бўлди.
Таъкидлаш жоизки, ҳозирда мамлакатимизда бошқа соҳалар қатори фармацевтика саноати ҳам фаол ривожланиб бормоқда. Маҳаллий фармацевтика корхоналари томонидан сифатли, рақобатбардош, хавфсиз, самарадор дори воситалари ишлаб чиқарилиши йўлга қўйилган бўлиб, нафақат давлатимиз ҳудудида, балки хорижий, жумладан, МДҲ давлатлари, АҚШ, Канада, Афғонистонга ва бошқа давлатларга ҳам дори воситалари экспорт қилинмоқда. Бундан ташқари, Европа фармацевтика ассоциацияси билан самарали ҳамкорлик юртимиз аҳолиси ва соғлиқни сақлаш муассасаларини арзон ва сифатли дори-дармон билан таъминлаш даражасини янада оширишга хизмат қилади.
Европалик фармакопеянинг 163-сессиясида муҳим аҳамиятга эга бўлган воқеа Соғлиқни сақлаш учун дори воситаларининг сифати бўйича Европа кенгаши директорати директори Сузанна Кайтель ҳамда “Дори воситалари, тиббий буюмлари ва тиббий техника экспертизаси ва стандартизацияси Давлат маркази” ДУК директори Шерзод Абдуғаниев ўртасида имзоланган “Ўзбекистон Республикаси давлат фармацевтика институтини яратиш учун Европа фармакопеясининг матнларидан нусха кўчириш ва мослаштириш ҳуқуқини бериш тўғрисида”ги келишув бўлди.
– Бугун юртимизда 150 дан ортиқ маҳаллий дори воситалари ва тиббий буюмлар ишлаб чиқарувчи корхоналар мавжуд бўлиб, улар томонидан 2500 номдаги дори воситалари давлат рўйхатидан ўтказилган, – дейди Шерзод Абдуғаниев. – Ҳозиргача дори-дармонларнинг сифат назорати бир қатор хориж мамлакатларнинг халқаро эътироф этилган фармакопеялари талабларига мувофиқ амалга оширилар эди. Эндиликда мазкур келишувга мувофиқ, ягона, халқаро талаблар билан мувофиқлаштирилган Ўзбекистон Давлат фармакопеяси чоп этилади. Натижада дори воситалари, реактивлар, дори шакллари сифат назоратининг уйғунлашган замонавий халқаро стандарт талаблари даражасида амалга ошириш, уларнинг хавфсизлигини таъминлаш ҳамда маҳаллий дори воситаларини хорижий давлатларда рўйхатдан ўтказиш жараёнининг қисқа муддатларда амалга ошириш имконияти юзага келади. Бу, ўз навбатида, мамлакатимиз фармацевтика саноатининг экспорт салоҳиятини сезиларли даражада оширади.
