Си Цзиньпин давлат телеканаллари орқали мамлакат оғир аҳволда эканлигини айтган. Бу ҳақда Кун.уз маълумот берди.
«Биз хавфли вазиятга дуч келдик, янги коронавируснинг тарқалиши тезлашмоқда. Биз касалликка қарши курашни ва уларнинг олдини олишни доимий равишда кучайтирмоқдамиз. Бироқ ҳозир биз жамоат соғлиқни сақлаш тизимида жиддий фавқулодда инқирозга дуч келдик», деган Си Цзиньпин.
Пекин ва Шанхайда маҳаллий ҳокимият вирусни юқтирган ҳудудлардан келган фуқароларга мурожаат қилиб, 14 кунлик муддат давомида жамоат жойларига ташриф буюришдан ихтиёрий равишда чекланишни илтимос қилган.
Шанба куни кечаси Хитой Янги йилни кутиб олди, аммо 2019-nCoV коронавируси сабабли кўплаб байрамлар бекор қилинди.
Сўнгги маълумотларга кўра, Уханда коронавирус пайдо бўлганидан буён камида 56 киши вафот этди. Сўнгги бир кун ичида қурбонлар сони 15 кишига ошди.
Коронавируснинг янги туридан келиб чиққан пневмония билан касалланган беморларнинг сони бир кунда 688 кишига ортган. Дунё бўйича 2000дан ортиқ одам янги коронавирусни юқтирган.
Касалланиш ва ўлим ҳолатларининг аксарияти Хитойда кузатилган, аммо вирус Таиланд, Вьетнам, Сингапур, Япония, Жанубий Корея, Тайван, Непал, Франция ва АҚШда ҳам аниқланган. Зарарланишнинг энг кўп ҳолати Хубэй провинцияси ва унинг маъмурий маркази Ухань шаҳрида.
Якшанба куни Канада 22 январь куни Ухандан қайтган эркакда 2019-nCoV коронавирус юқтиришнинг биринчи шубҳали ҳолати ҳақида хабар берди. Бемор барқарор ҳолатда касалхонага ётқизилган, унинг оила аъзолари изоляция қилинган.
Шанба куни Австралия ҳукумати коронавирус билан касалланишнинг мамлакатдаги биринчи ҳолатини тасдиқлади. Мельбурн шаҳридаги касалхонада аҳволи барқарор ҳолатдаги хитойлик сақланмоқда, у вирус авж олган Ухань шаҳрида бўлиб, 19 январь куни Австралияга учиб келган.
Малайзияда шанба куни коронавирус инфекциясининг учта ҳолати тасдиқланди. Уларнинг барчаси Сингапурда вирус ташхиси қўйилган эркакнинг қариндошлари бўлган Хитой фуқароларидир: унинг 65 ёшли рафиқаси ва икки набираси.
Давлат телевиденияси туризм соҳаси уюшмасидан иқтибос келтирган ҳолда, душанба кунидан бошлаб мамлакатда туристик гуруҳлар томонидан ташкиллаштирилган барча парвозлар тўхтатилиши ҳақида хабар берди.
Вирусли янги йил
Пайшанба куни Хубэйдан ташқарида вирусдан ҳалок бўлишнинг биринчи ҳолати кузатилди – Хубэйга қўшни провинцияда. Яна бир ўлим мамлакат шимолида, Ухань шаҳридан 2000 километр нарида жойлашган Россия билан чегарадош Хэйлунцзян провинциясида қайд этилган.
Буларнинг барчаси Хитойда Янги йилни нишонлаш бошланганда содир бўлди. Айни вақтга келиб кўп тадбирлар бекор қилинган.
Миллионлаб хитойликлар байрамни ўз оилалари билан нишонлаш учун уйларига қайтишмоқда, аммо расмийлар янги чекловларни давом эттирмоқда – асосан Хубэйда. Чекловлар 13 миллионга яқин одам истиқомат қилувчи 13 шаҳарга ва биринчи навбатда провинция пойтахти Уханга алоқадор. Фуқаролар ҳаракатини чеклашга қаратилган ушбу чораларнинг қатъийлиги шаҳарларга қараб фарқланади.
Якшанба куни АҚШ ўз фуқаролари ва дипломатларини Ухань шаҳридан олиб чиқиб кетиш учун чартер рейс ташкил қилмоқчи. АҚШ Давлат департаментининг таъкидлашича, Ухандаги бош консуллик ходимлари эвакуация қилинади ва АҚШнинг бошқа фуқароларига чекланган миқдордаги ўринлар ажратилади.
Вирус Европада ва АҚШда
Хитойдан ташқаридаги вирус орттириш ҳолатлари АҚШ ва Европада ҳам кузатилди.
Франция соғлиқни сақлаш вазири Агнес Бюзеннинг айтишича, жума куни кечқурун биринчи ҳолат Бордода, иккинчиси Париж ҳудудида аниқланган.
Унинг сўзларига кўра, Бордо касалхонасига ётқизилган киши Ухандан келган 48 ёшли хитойлик эркакдир. Иккинчи ҳолат ҳақида фақат бемор Хитойга боргани ва ҳозирда Париждаги шифохоналардан бирида эканлиги маълум.
Америка касалликларни назорат қилиш ва олдини олиш марказлари АҚШда иккита коронавирус ҳолати қайд этилганини тасдиқлади: Чикаго ва Вашингтонда. Беморлардан бири 13 январь куни Ухандан Чикагога қайтган, иккинчиси Вашингтонда касалхонага ётқизилди. 22 штатда жами 63та тахминий ҳолат текширилмоқда.
2019-nCoV билан зарарланганлар, шунингдек, Япония, Тайван, Таиланд, Жанубий Корея, Сингапур ва Вьетнамда ҳам бор.
Пайшанба куни Хитой пойтахти ой тақвимига биноан янги йилни нишонлашга бағишланган кенг қамровли тадбирларни бекор қилишга қарор қилди ва Пекиннинг тарихий қисмини ёпди.
Бундан ташқари:
Уханнинг ўзида, шунингдек, Эчжоу ва Эньши шаҳарчаларида карантин давом этмоқда. Уханда автобуслар, паром ва метро ҳаракати тўхтатилган, шаҳардан чиқиб кетадиган барча рейслар бекор қилинган, блокпостлар ўрнатилган. Ресторан, кафе ва кинотеатрлар ёпиқ.
Шаҳарда шошилинч равишда катта касалхоналар қуришга киришилди.
Ухань аҳолиси шифохоналардаги улкан навбат видеолари ва фотосуратларини ижтимоий тармоқларга жойлаштирмоқда.
Жаҳондаги вазият
Жаҳон соғлиқни сақлаш ташкилоти вирус билан боғлиқ халқаро фавқулодда вазият эълон қилмади, бунинг қисман сабаби Хитойдан ташқарида кузатилган вирус юқтириш ҳолатларининг кўп эмаслигидир.
«Бу Хитой учун фавқулодда вазият, аммо у ҳозирча дунё миқёсидаги соғлиқни сақлаш ҳолати учун фавқулодда вазиятга айлангани йўқ, аммо бундай бўлиши ҳам мумкин», деди Жаҳон соғлиқни сақлаш ташкилоти бош директори Тедрос Гебрейесус.
Жума куни Сингапурда инфекциянинг учинчи ҳолати тасдиқланди. Хитойдан ташқарида энг кўп касалланиш Таиландда. Британияда тасдиқланган ҳолатлар йўқ, фақат 14 киши текшириб кўрилди.
Ўзбекистонда вирус ҳозирча йўқ
Соғлиқни сақлаш вазирлиги Жаҳон соғлиқни сақлаш ташкилотига асосланиб коронавируснинг дунё бўйлаб тарқалиб кетиш хавфи камлиги, жиддий хавотирга ҳожат йўқлиги билдирганди.
23 январь куни Соғлиқни сақлаш вазирлиги ва Санитария-эпидемиологик осойишталик агентлиги ўтказган матбуот анжуманида республикага кириб келишнинг барча йўналишлари бўйича эпидемиологик назорат ўрнатилгани, барча чегара пунктлари керакли жиҳозлар, жумладан тепловизорлар билан таъминлангани ҳақида маълум қилинди.
Ўзбекистон Ташқи ишлар вазирлиги Ухань шаҳрида 30дан ортиқ Ўзбекистон фуқароси бўлиши мумкинлигини айтган.
25 январь куни ўтказилган Халқаро пресс-клуб сессиясида иштирок этган Ташқи ишлар вазири Абдулазиз Комилов Ухандаги ўзбекистонликлар ватанга олиб келиниши мумкинлигини айтганди. Аммо кейинроқ Хитой ҳукумати ҳеч қайси давлатга фуқароларини эвакуация қилишга рухсат бермаётганини маълум қилди.
