Му5
8

Чироқчида мол ўғрилигида гумон қилинган эркак ИИБ ходимларининг калтаклаши оқибатида вафот этгани айтилмоқда

ЖАМИЯТ 27.01.2020, 08:52
681
Чироқчида мол ўғрилигида гумон қилинган эркак ИИБ ходимларининг калтаклаши оқибатида вафот этгани айтилмоқда

Қашқадарё вилоятининг Чироқчи туманида яшовчи 32 ёшли эркак А.Ю. 22 январь, чоршанба куни яшаш уйидан туман ИИБ ходимлари томонидан олиб кетилган. 23 январь, пайшанба куни эса ИИБдан мурдаси чиққан. Бу ҳақда «Дарё» марҳумнинг яқинларига таяниб хабар берди. Келтирилишича, А.Ю. ИИБ ходимларининг калтаклаши оқибатида вафот этган.

Марҳум яқинларидан Баҳодир Холиқовнинг айтишича, марҳум А.Ю. Лангар қишлоғида ўғирланаётган чорва моллари ўғрилигида гумон қилинган.

— 22 январь куни соат чамаси 17:30 ларда марҳумнинг уйига борган ИИБ ходимлари уни туман ИИБга олиб кетган, — дейди Баҳодир Холиқов. — Эртаси куни эса унинг вафот этгани маълум бўлган.

Марҳумнинг акаси Шуҳрат Абдураҳмонов укасини олиб кетган ходимлар 4 нафар киши бўлганини, аммо укаси нима сабабдан олиб кетилаётганини айтишмаганини билдирди.

— 4 нафар ИИБ ходими уйга келди, — дейди Шуҳрат Абдураҳмонов. — Уларнинг 3 нафар формада эди, бир нафари эса фуқаро кийимидаги ходим эди. «Маҳалла идорасига олиб борамиз», дейишди. 23 январь куни соат 11:00 да эса маҳалла раиси Усмон Абдураҳмонов келиб, укам ИИБда вафот этганини айтди.

Қариндошларнинг таъкидлашича, марҳум мол бозорида чорва моллари олди-сотдиси билан шуғулланган.

Шуҳрат Абдураҳмоновнинг айтишича, Лангар қишлоғига борган прокуратура вакиллари марҳумни ИИБ ходимлари уриб ўлдирганини айтиб, 2 нафар ходим қўлга олинганини таъкидлаган.

Қашқадарё ИИБ ахборот хизмати «Дарё» мухбирининг мазкур ҳолат бўйича сўровига жавобан ҳолат ўрганилаётганини, маълумот берилишини маълум қилди.

Эслатиб ўтамиз, 23 январь, пайшанба куни вилоят ИИБда бўлиб ўтган матбуот анжуманида Чироқчи туман ИИБ раҳбари Фазлиддин Юсупов туманнинг Лангар қишлоғидаги мол ўғрилигида гумон қилинганлар тўдаси қўлга олинганини айтганди.

Айни пайтда ҳолатга аниқлик киритиш мақсадида “darakchi.uz” Бош прокуратура билан боғланди. Яқин вақт ичида аниқ маълумотлар тақдим этишга ҳаракат қиламиз.

Шарҳлар

Кун мавзуси: Фото
Об-ҳаво: Ташкент
+7° туман
Валюта курси
9528.49
USD -10.67
10319.35
EUR -119.35
150.07
RUB 1.3
rightuz