Ўзбекистонда коронавирус ташхиси қўйилган илк бемор аёл киши, олий тоифали шифокор эканлиги айтилмоқда. У 11 март куни «Париж-Тошкент» рейсида учган.
Манбалар хабар беришича, у билан бирга учган 48 йўловчи ҳамда экипажнинг 9 аъзоси айни вақтда тиббий кузатувга олинган. Йўловчиларнинг 24 нафари транзит йўловчилар бўлган, жумладан, Франциянинг 4 нафар, Италия ва Бразилиянинг бир нафардан фуқароси ушбу рейсда учган.
Қайд этилишича, бемор аёл билан мулоқотда бўлган тўққиз нафар оила аъзоси дарҳол изоляцияга олинган. Ундан ташқари, шу рейсда келиб, Ўзбекистонда қолган йўловчиларнинг бари аниқланиб, улар ҳам изоляцияга олинган. «Умумий 150 киши карантинда сақланмоқда», — дея маълум қилинди брифингда.
