my5
all

Қозоғистонлик аёлнинг Тўрткўлга тўйга келиб, коронавирус юқтиргани тўғрисидаги хабар ўз тасдиғини топмади

ЖАМИЯТ 01.04.2020, 15:30
668
Қозоғистонлик аёлнинг Тўрткўлга тўйга келиб, коронавирус юқтиргани тўғрисидаги хабар ўз тасдиғини топмади

Қозоғистон фуқаросининг Тўрткўлга тўйга келиб, коронавирус юқтиргани тўғрисидаги хабар бўйича Қорақалпағистон автоном республикаси Соғлиқни сақлаш вазирлиги расмий маълумот берди.

Шу йилнинг 30 март куни Қозоғистон ва Ўзбекистон электрон оммавий ахборот воситаларида коронавирус инфекциясини юқтирган қозоғистонлик аёлнинг Қорақалпоғистон Республикасининг Тўрткўл туманида яшовчи қариндошининг тўйида бўлгани, аёл билан яна 13 одам Ўзбекистонда бўлиб қайтгани ва уларнинг барчаси карантинга олингани ҳақида хабар тарқалди.

Хабарда айтилишича, Енбекшиқазақ туманида 1960 йилда туғилган Г. исмли аёл ўз қариндошлари билан 26 март куни қайтган ва улар чет элга чиқиб келган фуқаро сифатида карантинга олиниб, COVID-19 инфекциясига таҳлиллар олинган. Текширувдан сўнг, аёлда лаборатория таҳлиллар натижалари бўйича коронавирус борлигига гумон қилиниб, Есик шаҳридаги касалхонага ётқизилган.

Бу борада Қозоғистон Республикасининг тегишли идоралари томонидан Ўзбекистонга расмий маълумот келиб тушмади.

Лекин мамлакатимиздаги эпидемиологик вазият туфайли оммавий ахборот воситаларида тарқалган хабарга асосланиб, Қорақалпоғистон Республикаси Соғлиқни сақлаш вазирлиги ва Санитария-эпидемиологик осойишталик маркази томонидан гуруҳ ташкил этилиб, чуқурлаштирилган профилактик чора-тадбирлар (эпидемиологик суриштирув) ўтказилмоқда.

Тадбирлар давомида қуйидагилар аниқланди:

2020 йил 14 март куни Қозоғистон Республикасида доимий яшовчи 20 нафар фуқаро (шуларнинг 3 нафари вояга етмаган) микроавтобусда Қорақалпоғистон Республикасига меҳмонга келиб, шуларнинг Есик шаҳридан бўлган 16 нафар фуқаро (2 нафари вояга етмаган) Тўрткўл тумани «Тозабоғёп» ОФЙда яшовчи фуқаронинг уйида меҳмон бўлиб қолган.

Тараз шаҳридан бўлган 4 нафар фуқаро (1 нафари вояга етмаган) Элликқалъа тумани «Элликқалъа» ОФЙда яшовчи фуқаронинг уйига меҳмонга кетган.

Қозоғистонлик фуқароларнинг республикамизга келишдан мақсади тўй маросимларида иштирок этиш бўлган. 

14-25 март кунлари оралиғида Тўрткўл туманида бўлган фуқаролар 3 хонадонда меҳмонда бўлиб, 2020 йил 18 март куни никоҳ тўйда қатнашган.

Элликқалъа туманида бўлган фуқаролар 2 хонадонда меҳмонда бўлган. 

Қозоғистон Республикасидан меҳмонга келган 20 нафар фуқаро 2020 йил 25 март куни Тўрткўл туманидан Тошкент вилоятининг “Ғишткўприк” чегара пости орқали Қозоғистон Республикасига чиқиб кетган. Йўлда кетаётиб ҳеч қаерда тўхтамаган, бошқалар билан мулоқот қилмаган, ўзларининг ёнида бўлган озиқ-овқат маҳсулотларини истеъмол қилган.

Қозоғистон фуқароларининг барчаси 26 март куни ўз манзилларига етиб борган ва улар тегишли тартибда карантинга олинган. Уларнинг ичида 60 ёшли аёлда лаборатория текширувлари натижаси бўйича коронавирус касаллигига гумон қилиниб, юқумли касалликлар касалхонасига жойлаштирилган.

Касаллик билан гумон қилинган фуқаронинг яқинлари берган маълумоти бўйича, аёлнинг лаборатория текширув натижаси коронавирусни кўрсатган бўлса ҳам, аёлда ва у билан мулоқотда бўлган фуқароларда касаллик белгилари йўқ экани, уларнинг аҳволи яхши экани маълум бўлди. 

Ҳозирги кунда Тўрткўл ва Элликқалъа туманларида қозоғистонлик фуқаролар билан мулоқотда бўлган одамлар аниқланиб, тиббий кўрикдан ўтказилди, тегишли лаборатория таҳлиллари олинди. Уларнинг тана ҳарорати назоратга олиниб, 14 кунлик уй шароитидаги карантинга олинди. Шу кунга қадар бу фуқароларнинг ҳеч бирида коронавирус касаллигининг белгилари аниқланмади. 

Бу ҳолат бўйича текширув ишлари давом этмоқда. Уларнинг натижаси бўйича қўшимча маълумот берилади.

Шуни ҳам алоҳида таъкидлаш жоиз, Тўрткўл ва Элликқалъа туманларида профилактик тадбирларнинг ўтказилаётгани аҳоли орасида бу туманларда коронавирус инфекцияси аниқланган деган нотўғри маълумотлар, турли миш-мишларнинг тарқалишига сабаб бўлмоқда. Бироқ бу профилактик тадбирлар айнан инфекция тарқалишининг олдини олиш учун ўтказилаётганини маълум қиламиз.

2020 йил 31 март соат 22:30 ҳолатига кўра, Қорақалпоғистон Республикасида коронавирусга чалинган бирорта бемор аниқланмади. Бу маълумот расмий, объектив ва энг ишончли маълумот бўлиб ҳисобланади. Яна бир марта таъкидлаш жоиз, Қозоғистон Республикасининг тегишли идоралари томонидан Ўзбекистонга расмий маълумот келиб тушмагани учун электрон оммавий ахборот воситаларида тарқалган хабар норасмий мақомга эга бўлиб, фуқароларимизнинг хавотирланишига ҳеч қандай асос йўқ.

Бугунги кунда коронавирус инфекцияси тарқалишининг олдини олиш ва уни қисқа фурсатда бартараф этиш, аҳолининг эпидемиологик осойишталиги ва хавфсизлигини сақлаш, фуқароларнинг карантин ва чеклов қоидаларига амал қилишини назорат қилиш мақсадида Соғлиқни сақлаш, Ички ишлар вазирликлари, Миллий гвардия, Фавқулотда вазиятлар бошқармаси, Санитария-эпидемиологик осойишталик маркази томонидан кенг кўламли чора-тадбирлар амалга оширилмоқда.

Соғлиқни сақлаш вазирлиги халқимиздан ижтимоий тармоқларда тарқалаётган турли асоссиз хабарларга ишониб қолмай, фақатгина расмий манбаларнинг маълумотларидан хабардор бўлиб боришини, ваҳимага берилмасдан, иложи борича уйдан чиқмасликни, кўчага ёки жамоат жойларига чиққанда ҳимоя ниқобларини тақиб чиқишни, энг асосийси, тавсия этилаётган санитария-гигиена қоидаларига қатъий амал қилишини сўрайди.

Шарҳлар

Кун мавзуси: коронавирус
Об-ҳаво: Ташкент
+34° ясно
Валюта курси
10139.30
USD 9.74
11051.84
EUR 96.72
141.35
RUB 3.81