Австриянинг Тироль федерал ҳудудида 95 ёшли отахон коронавирусдан тузалиб, клиникадан чиқди, деб хабар берди ria.ru нашри.
Хабарда айтилишича қариялар уйида яшовчи бу сал кам юз ёшлик отахонда инфекция аломатлари 15-мартда аниқланган. Уни ҳолсизлик, иситма ва йўтал безовта қилган. Шундан сўнг отахон Инсбрук клиникасининг юқумли касалликлар бўлимига ётқизилди.
Шифохонага ётгач бемор аҳволи кундан-кунга яхшилана бошлади. Уч ҳафтадан сўнг, коронавирусга топширилган таҳлил натижалари унда манфий чиқди. Бу мўъжиза кекса ёшда ҳам ушбу касалликни енгиш мумкинлигини кўрсатди.
Австрия соғлиқни сақлаш вазирлиги маълумотига кўра, республикада коронавирус туфайли вафот этганлар сони 7 апрел санасига қадар 243 нафарга етган, жами 12,5 минг киши касалланган. Айни вақтда мамлакатда кундалик статистикага кўра коронавирусдан тузалганлар хасталикка чалинганлар сонидан кўпни ташкил қилмоқда.
