Бир муддат аввал ИИВ томонидан Наманганда “босар-тусарини билмаган депутат” изоҳи остида ИИБ ходимлари ва депутат орасида бўлиб ўтган келишмовчилик ҳақидаги хабар ва унга илова қилинган, ҳолат акс этган видео эълон қилинган эди. Шундан сўнг ушбу ҳолат бўйича турли баҳс-мунозаларлар ва муҳокамалар бошланиб кетди. Ижтимоий тармоқларда эса мазкур тортишув бўйича видеолавҳалар тўлиқ эълон қилинмагани ва депутатнинг ҳам ҳақлиги, унинг ҳам жабрлангани бўйича хабарлар тарқалди.
Айни пайтда Олий Мажлис Қонунчилик палатасининг бир гуруҳ депутатлари томонидан “босар-тусарини билмаган депутат” воқеа иштирокчиси бўлган ЙПХ инспекторининг хизмат “боди-камера”сида тасвирга олинган видео материалларни тўлиқ шаклда (монтажсиз) жамоатчиликка ошкор қилиниши ҳамда воқеанинг якуний муҳокамаси юзасидан Олий Мажлис Қонунчилик палатасига ИИВ томонидан ахборот берилиши сўралган. Бу ҳақда Олий Мажлис қонунчилик палатаси депутати Дониёр Ғаниев маълум қилди:
"Хабарингиз бор, жорий йил 15 апрель куни ИИВ Ахборот хизмати томонидан интернет тармоқларига жойланган “Босар-тусарини билмаган депутат” номли видеолавҳа кенг жамоатчилик орасида жиддий муҳокамаларни келтириб чиқарди. Унда Халқ депутатлари Наманган шаҳар кенгаши депутати Т.М. ва Наманган шаҳрига кираверишдаги “Қизилкўприк” постида турган ички ишлар ходимлари ўртасидаги тортишув жараёнлари акс этган эди.
Ушбу видеолавҳада акс этган воқеаларга аниқлик киритиш ва бу ҳақда жамоатчиликка маълум қилиш мақсадида бугун биз, Олий Мажлис Қонунчилик палатасининг бир гуруҳ депутатлари, Ички ишлар вазирига ўз мурожаатимизни юбордик. Мурожаатда ИИВ Ахборот хизмати томонидан эълон қилинган видеолавҳада фойдаланилган, жумладан воқеа иштирокчиси бўлган ЙПХ инспекторининг хизмат “боди-камера”сида тасвирга олинган видео материалларни тўлиқ шаклда (монтажсиз) жамоатчиликка ошкор қилиниши ҳамда воқеанинг якуний муҳокамаси юзасидан Олий Мажлис Қонунчилик палатасига Вазирлик томонидан ахборот берилиши сўралди", — дейилади депутатнинг ижтимоий тармоқдаги саҳифасига қўйилган хабарда. Шунингдек, расмий сўров сурати ҳам илова қилинган.
