Тошкентда бир ҳафта аввал ўғирлаб кетилган фуқаронинг жасади бўлакланиб, ҳовлига кўмиб ташлангани аниқлангани ҳақида Даракчига Бош прокуратура Матбуот хизмати раҳбари Ҳаёт Шамсутдинов маълум қилган эди.
Тошкент шаҳар ИИББнинг маълум қилишича, 8 май куни пойтахтнинг Учтепа туманида истиқомат қилувчи ўттиз бир ёшли Рахматуллаев Равшаннинг онаси ўғли «Lacetti» автомашинасида уйидан чиқиб, бедарак йўқолгани ҳақида хабар қилади.
Ўтказилган тезкор-тергов ҳаракатлар давомида аниқланишича, Юнусобод туманида яшовчи, 1990 йилда туғилган Жамолиддин Арипбаев (муқаддам судланган, айни пайтда ишсиз) Равшан Рахматуллаевдан 2020 йил январ ойида ойлик тўлаб бер иш шарти билан ижарага автомашина олган. Икки ой мабойнида пулларни тўлаб бермагани учун Равшан автомабилни қайтариб олгани сабаб Жамолиддинда Равшанга нисбатан адоват пайдо бўлган.
Ж.Арипбаев 1991 йилда туғилган М.Маҳкамов ва 1991 йилда туғилган Севара Абдулҳакимовалар билан тил бириктириб жиноятни режалаштиради.
Севара Абдулҳакимова 7 май куни Равшанни уйига таклиф қилади. Айтилган манзилда эса Равшанни «кутиб олган» уччовлон аввалига уни уриб-дўппослаб, қўл ва оёқларини арқон билан боғлашади. Сўнг ёнида бўлган 400 АҚШ доллари ва 1.000.000 сўм миқдоридаги пул маблағларини қўлга киритади.
Бу билан қанотланмаган жиноий гуруҳ Равшанни қийнаб, пул талаб қилишда давом этади. Айни жараёнда унинг уяли телефонида Телеграм месенджери орқали (Р.Р.нинг номидан унинг) ота-онаси билан СМС хабарлар алмашиб, уларга бир дўстининг уйидан 29.000 АҚШ долларини олиб, фалон манзилга етказиб беришни айтади. Ва шу тариқа улар 29.000 АҚШ долларини қўлга киритишади.
Шундан сўнг содир этган жиноятларини яшириш мақсадида Ж. Арипбаев 8 майга ўтар кечаси Равшанни ўлдиради. Бу ҳам камдек марҳумнинг мурдасини бўлакларга ажратиб, кўмиб юборади...
Мазкур видеода қотиллар ўзлари қилган жиноят ҳақида сўзлаб беришган.
Жасадни «Lacetti» русумли автомашинаси юкхонасига жойлаб, икки кун аввал ижарага олган Яшнобод туманидаги ҳовлига олиб боради ва шу ерда уни уриб, умрига зомин бўлади. Сўнг ёлланма ишчилар ёрдамида мазкур ховлида чуқур қаздириб, марҳумнинг мурдасини бўлакларга ажратиб, кўмиб юборади...
Тўпланган ҳужжатларга кўра, Ж.Арипбаевнинг ҳаракатларида қасддан одам ўлдириш жиноят таркиби мавжудлигини ҳисобга олиб, жиноят иши Тошкент шаҳар прокуратураси томонидан ЖКнинг 137-моддаси (Одам ўғрилаш )1-қисмидан ЖКнинг 97-моддаси (Қасддан одам ўлдириш) 2-қисми «и» банди ва 164-моддаси (Босқинчилик) 3-қисми «г» бандига қайта малакаланганди.
