Навбаҳорда карантин қоидаларини бузган тадбиркордан пора талаб қилган ДСЭН инспектори ушланди. Бу ҳақда "darakchi.uz"га Бош прокуратура Матбуот хизмати маълум қилди.
Департаментнинг Навбаҳор туман бўлими томонидан ўтказилган тезкор тадбирда Навоий вилояти Давлат санитария-эпидемиология назорати бошқармаси Навбаҳор тумани филиали инспектори Ш.Ҳ. ўз хизмат мавқеидан фойдаланиб, жиноятга қўл ургани аниқланди.
ДСЭН инспектори якка тартибдаги тадбиркор Ҳ.М.га карантин талабларига риоя этмасдан, ниқобсиз юрганлигини важ қилиб, унга нисбатан расмийлаштирилган маъмурий баённомани йўқ қилиш эвазига 100 минг сўм пора талаб қилган. Бироқ, у мазкур келишилган сўммани олаётган вақтида эса ашёвий далил билан ушланган.
Юқоридаги ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда, дейилади хабарда.
