my5

Buxoroda “Gazni qayta ishlash zavodi”da investision loyiha amalga oshirilmoqda (Foto)

Iqtisodiyot 27.09.2020, 13:13
500
Buxoroda “Gazni qayta ishlash zavodi”da investision loyiha amalga oshirilmoqda (Foto)

“O`zbekneftgaz” AJ Boshqaruvi raisi Mehriddin Abdullaev boshchiligidagi “Ishchi guruh” Buxoro viloyatidagi Gazli neft va gaz qazib chiqarish boshqarmasida bo`ldi.

Uglevodorod qazib chiqarish sur`atini oshirish, loyihaviy quduqlarni burg`ilash va ta`mirlash ishlarini sifatli hamda o`z vaqtida yakunlash bo`yicha qilinayotgan ishlar holati o`rganildi.

Boshqaruv raisi boshchiligida Gazli neft va gaz qazib chiqarish boshqarmasi “Gazli" gazni qayta ishlash zavodida investision loyihalarning bajarilish jarayoni, gaz qazib chiqarish ko`rsatkichlarining 9 oylik natijalari va 4-chorakda bajariladigan ishlarga oid sayyor yig`ilish o`tkazildi.

Tahliliy ruhda o`tgan yig`ilishda investision loyihalar doirasidagi gaz siquv kompressorining ishga tushirilishi bilan bog`liq holat, Boshqaruv raisi tomonidan tanqid qilindi. Shu sababli, ishga tushirish ishlari joriy yilning 5 oktyabriga qadar yakunlanishi borasida topshiriqlar berildi.

Shuningdek, Gazni oltingugurtdan tozalash kurilmasining 6-sex tarmog`ini 1 oktyabrga qadar ishga tushirilishi lozimligi belgilab olindi.

Tashrif davomida Gazdan propan-butan aralashmasini ajratib olish qurilmasi bo`yicha muammoli masalalar joyida o`rganib chiqildi va zarur texnik jihozlarni sotib olishni tezlashtirish yoki turdosh tashkilotlardan olib kelish vazifasi belgilab berildi.

Boshqaruv raisi boshchiligidagi “Ishchi guruh” tomonidan “Gazli" gazni qayta ishlash zavodi hududida turdosh tashkilotlar tomonidan hashar yo`li bilan olib borilayotgan obodonlashtirish ishlari har bir zavod va boshqarmalar kesimida tahlil qilindi. Obodonlashtirish ishlarini sifatli va qisqa muddatda yakunlash kerakligi borasida aniq ko`rsatmalar berildi.

Konlar va quduqlarda tabiiy gaz qazib chiqarish ishlari alohida o`rganildi. Jumladan, joriy yilning 4-choragida burg`ilash ishlarini jadallashtirish, 9 oy davomida bajarilmay qolgan ishlarni yil oxirigacha yakunlash ta`kidlandi.

O`zLITI mutaxassislari kondagi qazib chiqaruvchilar bilan doimiy ravishda birgalikda ish olib borishi, 2021 yilda burg`ilash quduqlarini aniq belgilab olinishi kerakligi aytildi.

“Doyaxotin” konida gaz kollektorlarini kengaytirish, kerakli MTR va montaj brigadalar bilan ta`minlash va ishlarni bir oy muddatda 9830 p/m 426 mm li quvur qurilishini yakunlan lozimligi belgilandi.

“O`rtaqum” va “Shortak” konlaridagi qidiruv va izlov quduqlaridan gaz oqimi olingan quduqlar O`zLITI bilan kelishilgan holda, 4-chorakda ishga tushirish taklifi Boshqaruv raisi tomonidan qabul qilindi.

Boshqaruv raisi Gazlidagi bu tashrifi davomida quduqlarni burg`ilash, ta`mirlash, tabiiy gaz qazib chiqarish holatiga alohida e`tibor berib, Gazli hududida qidiruv va izlov quduqlaridan 4 ta quduq qazilib sinov ishlaridan so`ng ijobiy natija olinib, ishlatishga topshirilganini e`tirof etdi.

Yil oxirigacha 12 ta quduqda ham qidiruv va izlov-burg`ilash ishlarini rejalashtirgani, biroq amalda ularning sonini 15 taga etkazish, o`z navbatida ishga qo`shish topshirig`i berildi.

Boshqaruv raisi Gazlidagi ob`ektlarda davom etayotgan qurilish-montaj ishlarini birma-bir o`rganib, ishni yanada jadallashtirish, kuz-qish mavsumida ishchilar uchun qulay sharoit yaratish kerakligini ta`kidladi.

Shuningdek, ishchi-xodimlar bilan suhbatda bo`lgan Boshqaruv raisi ularning yashash va ishlashi uchun mavjud bo`lgan muammolar bilan qiziqdi va o`rganish natijasida aniqlangan kamchiliklar, muammolar bartaraf etilishi bo`yicha topshiriqlar berildi.

 

Шарҳлар