Ko`pchilik aziyat chekadigan qandli diabet kasalligi faqat qarilik va semizlikka bog`liqmi? Kasallikning ilk belgilari va kelib chiqish sabablari qanday? Sog`liqni saqlash vazirligining rasmiy telegram kanalida berilgan ma`lumotlar asosida bu savollarga javob topishga urinamiz.
Savollarga Respublika ixtisoslashtirilgan endokrinologiya ilmiy-amaliy tibbiyot markazi diabetologiya ilmiy bo`limi xodimi, tibbiyot fanlari nomzodi Feruza Tohirova javob beradi:
- Ushbu kasallikning ikki xil turi keng tarqalgan. Boshqa turlariga chalingan bemorlarni kam uchratasiz. Ammo xastalikning turlaridan qat`iy nazar belgilari bir xil bo`ladi. Qandli diabetning 2-turi asosan katta yoshli insonlarda uchraydi va nasldan-naslga o`tadi. Uning asosiy sababi sog`lom turmush tarziga rioya qilmaslik hisoblanadi. Jumladan, noto`g`ri ovqatlanish, kamharakatlilik oqibatida kelib chiqadigan ortiqcha vazn qandli diabetning asosiy sababchisidir. Boisi, kasallikning 2-turi rivojlanishiga inson tanasida mushak to`qimasining kamayib, yog` to`qimasining ko`payishi hisoblanadi. Ammo xastalik semiz bo`lmagan insonlarda ham rivojlanishi mumkin. Kasallikning asosiy belgilari: og`iz qurishi, chanqash va shunga yarasha keragidan ortiqcha suyuqlik iste`mol qilib, ko`p peshob ajralishidir. Shuningdek, bunday bemorlarda umumiy holsizlik, oyoqlarda og`rik va keyinchalik yaralarning sekin bitishi kuzatiladi. Ortikcha vazni bo`lgan kishilarda qandli diabet ishtahani haddan ortib ketishi bilan ham namoyon buladi. Kasallikning dastlabki belgilari kuzatilgandayoq shifokorga murojaat qilish lozim. Har bir kishi o`zining tanasi vaznini nazorat qilib borishi, uning me`yoriy ko`rsatkichlardan oshib ketishiga yo`l qo`ymasligi talab etiladi.
