18 fevral kuni soat 1:00 larda Yashnobod tumani Katta Qo`yliq MFYda qotillik sodir etilgan. Bu haqda O`zbekiston Respublikasi IIV huzuridagi Tergov departamenti xabar berdi.
Xabarga ko`ra, 18 fevral kuni soat 19:30 larda 23 yoshli Ag`zamjon X., Yashnobod tumani Katta Qo`yliq MFYda joylashgan “Raimjon ota” kafesida tanishi 28 yoshli Bobomurod M., bilan birgalikda spirtli ichimlik iste`mol qilgan va sherigi bilan tortishib qolgan.
Suhbat davomida Bobomurod M., o`zini “Milliy gvardiya va IIB xodimi” ekanini aytib, Ag`zamjon X.ni shaxsiyatiga teguvchi so`zlar bilan haqorat qilgani sabab Ag`zamjon X. “senlar meni 10 sutkaga qamatgansizlar” deb unga nafrati uyg`onib, shu kuni soat 1:00 larda Bobomurod M.,ni Katta Qo`yliq MFY hududidagi er osti yo`lagiga olib borib, u erda tanasining turli joylariga oyoq va qo`llari bilan tan jarohati etkazib, hodisa joyidan yashiringan.
Natijada Bobomurod M., olgan tan jarohatlarining oqibatida hodisa joyida vafot etgan.
Mazkur holat yuzasidan Ag`zamjon X.,ga nisbatan O`zbekiston Respublikasi Jinoyat kodeksining 104-moddasi 3-qismi “D” bandi (qasddan badanga og`ir shikast etkazish) bilan jinoyat ishi qo`zg`atilib, “qamoqqa olish” tarzidagi ehtiyot chorasi qo`llanilgan.
Olib borilgan tergov harakatlari davomida, marhum Bobomurod M., “Milliy gvardiya” xodimi emasligi, 2-guruh nogironi bo`lib, hech qaerda ishlamasligi, Ag`zamjon X., esa mardikorlik bilan shug`ullanib bir necha marotaba ma`muriy huquqbuzarlik sodir etganligi tufayli, unga nisbatan 10 sutka qamoq jazosi qo`llanilganligi ma`lum bo`lgan.
Hozirda tergov harakatlari davom etmoqda.
