2021-yil 21-sentyabr kuni O`zbekiston Respublikasi Prezidentining Afg`oniston bo`yicha maxsus vakili Ismatulla Irgashev Germaniyaning O`zbekistondagi Favqulodda va Muxtor Elchisi Tilo Klinner bilan uchrashuv o`tkazdi. Bu haqda Tashqi ishlar vazirligi Axborot xizmati xabar bermoqda.
Uchrashuv davomida tomonlar Afg`onistondagi vaziyat, shuningdek, ushbu mamlakatdagi gumanitar holatni muhokama qildilar.
Germaniya Elchisi O`zbekistonning Afg`onistonda uzoq muddatli va barqaror tinchlikni o`rnatishdagi muhim rolini ta`kidladi.
Shu bilan birga, T.Klinner Afg`onistondan Germaniya va boshqa chet el fuqarolarini evakuasiya qilishda ko`rsatgan yordami uchun O`zbekiston tomoniga alohida minnatdorlik bildirdi.
Shuningdek, Germaniya tomoniga O`zbekistonning Afg`oniston xalqiga gumanitar yordam ko`rsatish va qo`shni davlatning iqtisodiy tiklanishiga ko`maklashish borasidagi sa`y-harakatlari haqida ma`lumot berildi.
