O`zbekiston Respublikasi Prezidenti Shavkat Mirziyoevning makroiqtisodiy ko`rsatkichlar, soliq-byudjet siyosati, davlat byudjetining joriy yilda kutilayotgan ijrosi va 2020 yilga mo`ljallangan parametrlar muhokamasiga bag`ishlangan yig`ilishida eksport tarkibi, tashqi bozordagi talab va yurtimiz korxonalarining undagi o`rni chuqur tahlil qilindi.
O`zbekiston eksportining 50 foizidan yuqorisini hanuzgacha gaz, oltin, kumush, mis, rux, polietilen kabi xomashyolar tashkil etayotgani, arzon xomashyo mavjud bo`lgan tarmoqlar bo`yicha ishlab chiqarish va eksport etarlicha yo`lga qo`yilmayotgani ko`rsatib o`tildi.
Masalan, mamlakatimizda charm-poyabzal eksporti bo`yicha kamida 1,5 milliard dollarlik salohiyat bo`lsa-da, hozirda bu boradagi ko`rsatkich 200 million dollarga ham etmaydi.
Investisiyalar va tashqi savdo vazirligi, “O`zcharmsanoat” uyushmasiga terini chuqur qayta ishlab, ayollar poyabzallari va sumkalari, sport anjomlari va boshqa tayyor charm-attorlik mahsulotlari ishlab chiqarishni kengaytirish orqali eksport hajmini 2 barobar oshirish vazifasi qo`yildi.
To`qimachilik mahsulotlari eksporti so`nggi ikki yilda 2 barobarga oshib, 1 milliard 600 million dollarga etgan bo`lsa ham, uning deyarli yarmini ip-kalava tashkil etmoqda.
Shu bois Iqtisodiyot va sanoat vazirligi, “O`zto`qimachiliksanoat” uyushmasiga eksportda tayyor mahsulotlar ulushini oshirish bo`yicha ko`rsatmalar berildi.
