Qing`ir ishning qiyig`i etti yildan keyin chiqdi (Video)

2013 yilda Toshkent shahrida 2 noma`lum shaxs mashina o`g`irlash uchun odam o`ldirgan. Bu haqda "Zamon" ko`rsatuvida ma`lum qilindi.

-Farzand dog`i yomon ekan, – deydi ko`zlari yoshga to`lgan marhumning onasi Boltaboeva Zamira. –O`g`limning o`rtoqlarini ko`rsam ham yig`layman. Nimaga do`stlari yuribdi, mening bolam yo`q, deb o`ksiyman.

Marhumning onasi Zamira Boltaboevaga "29 yoshli o`g`limning qotili kim?". degan savol tinchlik bermadi. Tergov guruhi qotillik qurboni bo`lgan Boltaboev Sherali shaxsiga oid barcha ma`lumotlarni to`pladi. Toshkent shahrida kirakashlik bilan shug`ullangan marhumga tegishli "Neksiya-1" avtomashinasini topish uchun o`nlab, yuzlab guvohlar surishtirilganiga qaramay, jinoyatni ochishning iloji bo`lmadi. 

Sherali Boltaboev ushbu qotillikning yagona qurboni bo`lmagan. Jinoyatchilar bir nechta haydovchilarning umriga zomin bo`lgan. Qotillar haydovchilarni ovloq joylarga borishga ko`ndirib, arqon yordamida bo`g`ib o`ldirishgan. Keyin esa murdalarni O`rta-Chirchiq tumanidan oqib o`tuvchi Qorasuv kanaliga uloqtirishgan. Buzoqning yugurgani somonxonagacha, deganlaridek, oradan ancha vaqt o`tishiga qaramay, huquq-tartibot idorasi xodimlarining sa`y-harakatlari tufayli qotil jinoyatchilar qo`lga olindi va tegishli jazoga tortildi.