Қинғир ишнинг қийиғи етти йилдан кейин чиқди (Видео)

2013 йилда Тошкент шаҳрида 2 номаълум шахс машина ўғирлаш учун одам ўлдирган. Бу ҳақда "Zamon" кўрсатувида маълум қилинди.

-Фарзанд доғи ёмон экан, – дейди кўзлари ёшга тўлган марҳумнинг онаси Болтабоева Замира. –Ўғлимнинг ўртоқларини кўрсам ҳам йиғлайман. Нимага дўстлари юрибди, менинг болам йўқ, деб ўксийман.

Марҳумнинг онаси Замира Болтабоевага "29 ёшли ўғлимнинг қотили ким?" деган савол тинчлик бермади. Тергов гуруҳи қотиллик қурбони бўлган Болтабоев Шерали шахсига оид барча маълумотларни тўплади. Тошкент шаҳрида киракашлик билан шуғулланган марҳумга тегишли "Нексия-1" автомашинасини топиш учун ўнлаб, юзлаб гувоҳлар суриштирилганига қарамай, жиноятни очишнинг иложи бўлмади. 

Шерали Болтабоев ушбу қотилликнинг ягона қурбони бўлмаган. Жиноятчилар бир нечта ҳайдовчиларнинг умрига зомин бўлган. Қотиллар ҳайдовчиларни овлоқ жойларга боришга кўндириб, арқон ёрдамида бўғиб ўлдиришган. Кейин эса мурдаларни Ўрта-Чирчиқ туманидан оқиб ўтувчи Қорасув каналига улоқтиришган. Бузоқнинг югургани сомонхонагача, деганларидек, орадан анча вақт ўтишига қарамай, ҳуқуқ-тартибот идораси ходимларининг саъй-ҳаракатлари туфайли қотил жиноятчилар қўлга олинди ва тегишли жазога тортилди.