Sirdaryo viloyat hokimi bugungi fojia sabab, oila-a`zolaridan ayrilgan 18 yoshli qizni o`z otalig`iga oldi

Jamiyat 17.02.2020, 17:51
4252
Sirdaryo viloyat hokimi bugungi fojia sabab, oila-a`zolaridan ayrilgan 18 yoshli qizni o`z otalig`iga oldi

Bugun Sirdaryo viloyati Oqoltin tumani Sardoba shaharchasi “Ko`rkam diyor” mahallasi “Robot” ko`chasida joylashgan bir qavatli, 3-uy 1-xonadon (kottej)da yong`in sodir bo`lib, bir oilaning olti nafar a`zosi baxtsiz hodisa qurboni bo`lgani xaqida xabar bergan edik.

Sirdaryo viloyati hokimligining xabar berishicha, erta tongdan viloyat hokimi, viloyat sektor rahbarlari hamda tashkilotlardan iborat tarkibda guruh tuzilib, hodisa sodir bo`lgan xonadonga borildi. Shaxsan viloyat hokimi G`.Mirzaev halok bo`lganlarning yaqinlariga chuqur taziya izhor qilib, hamdardligini bildirgan.

Viloyat hokimi marhumlarni dafn marosimlarida bosh-qosh bo`lib, yong`in sodir bo`lgan uyni qisqa muddatda ta`mirlagan holda voqea sodir bo`lgan vaqtda boshqa joyda bo`lgan oilaning 18 yoshli qizi O.O`.ga topshirilishini hamda uni o`z otalig`iga olib, holidan doimiy xabar olib turishini ma`lum qildi va amaliy ishlar boshlab yuborildi.

Shu o`rinda marhumlarning motam tadbirlari va dafn marosimlarini o`tkazish bilan bog`liq xarajatlar uchun 30 mln. so`m moddiy yordam ko`rsatildi, ularning ma`rakalarini o`tkazish uchun mas`ullar biriktirildi. Shuningdek, viloyat hokimi tomonidan marosimga yig`ilganlardan xonadonlarda gaz va elektr isitkich moslamalaridan foydalanishda xavfsizlik qoidalariga rioya qilish zarurligi aks holda oqibati ayanchli holda yakun topishi mumkinligi haqida qayta-qayta ta`kidladi.

Mahalla-ko`y, qarindosh-urug`lar ularning qayg`uli kunida hamdard bo`lmoqda.

Шарҳлар