Жорий йилнинг 1 декабрь куни 4Р 92 “Қарши-Касби-Жейнов-Помуқ” автомобиль йўлининг Қарши тумани “Лаганди” маҳалласи ҳудудидан ўтувчи 14 километрида аянчли йўл транспорт ҳодисаси содир бўлди. “Матиз” автомашинаси носоз йўлни айланиб ўтиш чоғида қарама қарши йўналишга чиқиб кетиб, “Кобальт” автомашинаси билан тўқнашув содир этади.
- Дастлабки ўрганишларга кўра мазкур йўл транспорт ҳодисасига йўлнинг носозлиги сабаб бўлганлиги аниқланди, -дейди дейди вилоят ЙҲХБ ахборот хизмати раҳбари Жавлон Бахтиев. – Натижада “Матиз” автомашинаси ҳайдовчиси А.М. ва унинг йўловчиси бўлган Х.М. воқеа жойида вафот этишган. Шунингдек, ҳар иккала машинада бўлган бошқа икки нафар йўловчи оғир тан жароҳати олиб шифохонага ётқизилган.
Автоҳалокатлар сабаби ўрганиларкан, ҳар бир жиҳат синчковлик билан кўздан кечирилди. Асосий эътибор йўлнинг сифатига қаратилди. Ушбу ҳалокатда икки нафар инсон умрига зомин бўлди. Афсуски, эндиликда масъулиятсизлик билан ёндошилган вазифанинг бу каби изоҳи вақтни ортга қайтара олмайди. Йўл-транспорт ҳодисаларининг олдини олишга қаратилган навбатдаги профилактик тадбирларда ҳайдовчиларга нотекис йўлларда қарама қарши йўналишга чиқмаслик, тезликни меъёридан оширмаслик тарғиб қилинди. Оқибатлари мисоллар билан тушунтирилди.
