Жорий йилнинг 1 декабрь куни ўтказилган "Нефтчи"-"Турон" учрашувидаги тартибсизликлар келиб чиққани ҳақида хабар берган эдик. Кўп ўтмай эса Фарғона вилояти ИИБ Ахборот хизмати ҳакамни калтаклаган аламзада футбол мухлисларининг барчаси қўлга олингани ҳам маълум қилди.
Кеча ҳолат юзасидан "Нефтчи" ФК қароргоҳида йиғилиш ўтказилган. Бу ҳақда "Нефтчи" футбол клубининг расмий телеграм каналида хабар берилди.
Йиғилишга Фарғона вилояти ҳокими Ҳ.Ҳ.Бозоров раислик қилган.
Йиғилишда 1 декабрь куни ўтказилган "Нефтчи"-"Турон" беллашувида "Нефтчи" жамоаси футболчиларининг ўйинни бошқарган ҳакамларга нисбатан қилган қўполликлари туфайли юзага келган тартибсизликлар натижасида футболга хос бўлмаган ҳолат бўлганлиги,"Нефтчи" жамоаси масъул ходимлари клуб футболчиларини ўйинга етарлича жисмонан ва руҳан тайёрлашда сусткашликка йўл қўйганлиги, тартибсизлик келтириб чиқарган футболчиларга нисбатан қонунда белгиланган тартибда тегишли чоралар кўрилганлиги ҳақида гапирилган.
Шунингдек, "Нефтчи" ФК масъул ходимлари футболчиларини ўйинга етарлича жисмонан ва руҳан тайёрлашда сусткашликка йўл қўйганлиги учун бош мураббий А.Дурмонов эгаллаб турган лавозимидан озод этилган.
