Ижтимоий тармоқларда “Андижонча тендер, қариндошлик ва миллиардлик давлат буюртмалари” номли хабар эълон қилинган эди.
Яъни унда Андижон вилоятида Milano Biznes Servis компанияси қарийб 20 млрд сўмлик давлат харидларини ютиб олгани айтилган. Унинг таъсисчиси Муҳиддин Қодиров эса бир вақтнинг ўзида “Ягона буюртмачи хизмати” раҳбари ҳам ҳисобланади.
Бундан ташқари, вилоят қурилиш бошқармаси бошлиғи Рустамбек Ходибоев миллиардлаб сўмлик давлат буюртмаларини бажараётган Ixtisoslashgan Shahrixon Qurilish компаниясининг таъсисчиси ҳам ҳисобланади.
Худди шундай лойиҳалар таъсисчилари “Ягона буюртмачи хизмати” раҳбарининг қариндошларига тегишли Andijon Ihlos Qurilish компанияси томонидан ҳам амалга оширилаётгоани айтилган эди.
Шунга кўра, Андижонда мукаммал таъмирлаш ва реконструкция ишларини амалга ошириш учун ўтказилган танлов ва тендерларда шаффофлик таъминланмаганлиги баён этилган.
Айни пайтда Андижон вилояти прокуратуранинг маълум қилишича, ҳозирда мазкур хабарда баён этилган ҳолатлар вилоят прокуратураси томонидан тегишли соҳа мутахассислари иштирокида ўрганилмоқда. Ўрганиш натижаси бўйича қўшимча хабар берилади.
Эслатиб ўтамиз, сал аввал Жиззах кўчаларини безаш учун ҳоким қизининг МЧЖсидан 2 миллиард сўмлик гуллар сотиб олингани хабар қилинган эди. Шундан сўнг, Коррупцияга қарши курашиш агентлиги томонидан ушбу ҳолат юзасидан ўрганиш бошланган.
