Бугун вазирлик раҳбарияти томонидан 10 январь куни Жиззах шаҳридаги 6 қаватли бинонинг 7 та хонадони қулаб тушгани сабабларини ўрганиш натижаси бўйича қўшимча маълумотлар очиқланди. Тадбирда Қурилиш вазири Ботир Зокиров, вазир ўринбосарлари Козим Тўлаганов ва Шуҳрат Ҳошимов томонидан журналистларни қизиқтирган барча саволларга батафсил жавоб берилди.
Маълум бўлишича, Жиззах шаҳри, «Зилол» МФЙ, Мустақиллик қўчасида 1-қавати савдо ва маиший хизмат кўрсатиш шаҳобчаси, 2, 3-қаватлари турар-жой биноси қурилиши бўйича буюртмачи “Баракали Қоракўл Чорвадор” фермер хўжалиги томонидан Жиззах вилоят Қурилиш соҳасида ҳудудий назорат инспекциясига Ўзбекистон Республикаси Вазирлар Махкамасининг 2018 йил 18 майдаги 370-қарорига асосан Давлат хизматлари маркази орқали 2020 йил 29 январ куни мурожаат қилинган, инспекция томонидан белгиланган тартибда рўйхатга олинган ва қурилиш-монтаж ишларини бошлаш учун № 16-сон рухсатнома берилган.
Дастлаб, “Жиззах Бунёдкор Лойиҳа” МЧЖ томонидан бинонинг 3 қаватли лойиҳа-смета ҳужжатлари ишлаб чиқилган.
Ушбу лойиҳа-смета ҳужжатлари “Шаҳарсозлик ҳужжатлари” ДУК Жиззах вилоят филиали томонидан 2020 йил 27 январда №023/1-20-сон ижобий йиғма эксперт хулосаси олинган.
Шунга қарамасдан буюртмачи-пудратчи томонидан ҳўжалик усули билан 1-2 қаватларида савдо ва маиший хизмат кўрсатиш шаҳобчалари ҳамда 3-6 қаватларида турар-жой бинолари қурилиши бўйича лойиҳа ҳужжатларини “DISCOVERY ARCHITECTS GROUP” МЧЖ томонидан қайта ишлаб чиқилган, Жиззах вилоят Қурилиш бош бошқармаси ҳузуридаги ҳудудий архитектура-шаҳарсозлик Кенгаши билан келишилмаган, лекин Жиззах вилояти “Шаҳарсозлик ҳужжатлари” ДУК Жиззах вилоят филиалининг 2020 йил 12 октябрда №393/1-20-сон ижобий йиғма эксперт хулосаси олинган.
Буюртмачи томонидан лойиҳа-смета ҳужжатларига ўзгартиришлар киритилган (уч қаватли бинони олти қаватли бинога ўзгартирилган, лойиҳа-смета ҳамда экспертиза хулосаси ўзгартирилган), Ўзбекистон Республикаси Вазирлар Маҳкамасининг 2018 йил 18 майдаги 370-сон қарори, 5-иловаси, 20-бандига биноан 10 кунлик муддатда лойиҳа-смета ҳужжатларига ўзгартириш киритилиб, экспертизадан ўтказилганлиги юзасидан ҳудудий инспекцияга маълумот киритилмаган.
Объектда қурилиш-монтаж ишлари 2020 йилнинг март ойида бошланган. Жиззах вилоят ҚСҲН инспекцияси томонидан объектда бажарилаётган қурилиш-монтаж ишларининг лойиҳага мослиги, бажарилган ишларнинг сифати устидан ҳудудий назорат инспекция инспекторлари томонидан 6 маротаба назорат ишлари ўтказилган.
Назорат ишлари бўйича аниқланган камчиликларни бартараф этилиши юзасидан 2020 йил 21 августда буюртмачи ва пудратчи ташкилот “Баракали қоракўл чорвадор” фермер хўжалиги иш юрутувчиси А.Бобоевга объектда:
- ШНК 3.01.01-03 “Қурилиш ишлаб чиқаришни ташкил қилиш”нинг талабига зид равишда қурилиш объектида, лойиҳада келтирилган ўлчамларни натурага кўчириш ва вертикал режалаштириш далолатномалари тақдим этилмаганлиги;
- ШНК 3.01.01-03 “Қурилиш ишлаб чиқаришни ташкил қилиш”нинг талабларига асосан қурилиш объектига олиб келинган темир-бетон плита, ғишт, арматура ва цемент махсулотларига мувофиқлик сертификати тақдим этилмаганлиги;
- Объектда умумий ва махсус иш юритиш журналлари юритилмаганлиги ва яширин ишларни гувоҳлаш далолатномалари расмийлаштирилмаганлиги;
- КМК 3.01.02-00 “Қурилишда техника хавфсизлиги”нинг 1.12-бандлари талабларига амал қилган ҳолда қурилиш майдонидаги ишчилар махсус кийим ва ҳимоя воситалари билан тўлиқ таъминланмаганлиги;
- Уй-жойнинг пойдевор ва девор ишларида бажарилган қуйма бетонларнинг лойиҳавий мустахкамлигига мос келиши бўйича қурилиш-синов лабаратория хулосаси тақдим этилмаганлиги;
- Қурилиш объектига буюртмачи томонидан техник назоратчи ва ишларни юритиш учун иш юритувчи (прораб) буйруқ билан бириктирилмаганлиги сабабли инспекция томонидан №0144-сон муддатли ёзма кўрсатма берилган.
Мавзуга доир:
Жиззахда қулаган бинонинг ёнидагиси ҳам омонат тургани маълум бўлди (видео)
