Аввал хабар берганимиздек, ижтимоий тармоқларда Булунғур туманидаги 13-сонли мактабгача таълим муассасасининг мудираси тарбияланувчиларни урганлиги ва МТМда содир бўлаётган бошқа қонунбузилиш ҳақида хабар тарқалди.
Шундан сўнг, мазкур ҳолат юзасидан Булунғур туман прокуратураси томонидан терговга қадар текширув ҳаракатлари бошланди.
«Замон» информацион дастурида боғча мудираси Роҳатой Аҳророва ва калтакланган боланинг яқинлари билан суҳбат асосида ҳолат юзасидан маълумотлар тақдим этилди.
Мудиранинг маълум қилишича, ушбу видеотасвирлар унга нисбатан қасддан уюштирилиб, тарқатилган ва бу ишни МТТ психологи амалга оширган.
«Қизиққонлик қилдим. Билмаган тарзда амалга оширдим. Жуда ҳам жаҳлим чиқди. Чунки гуруҳда 30 га яқин бола бор эди. Эшикни очиб, хонага киришим билан ўша бола ёмон сўзлар айтиб, ҳаворат қилаётгани устидан чиқиб қолдим. Тўғри уруш мумкин эмас, аммо ўзимни тутиб тура олмадим", дейди Роҳатой Аҳророва.
Ҳодисани эшитган боланинг бобоси бу ишни шундай қолдириб бўлмаслигини, мудиранинг ҳаракатларига нисбатан ҳуқуқий баҳо берилиши лозимлигини айтмоқда.
"Бундай ҳолатлар аввал ҳам бўлган экан, аммо биз билмаганмиз. Наварам ҳар куни боғчага бормайман деб, хархаша қилади. Видеони кўриб, нега унинг боғчага боргиси келмаслигини тушундим. Мен мудирани кечирмайман",- дейди калтакланган болакайнинг бобоси.
Шу ўринда калтакланган болакайнинг ўзидан ҳам фикр сўралди.
"Энг яхши боғча опа Шаҳноза ва Диля опа. Роҳатой опа ҳамма болаларни уради" деди зукколиги учун МТТ томонидан алоҳида тақдирланган ва айни пайтда аҳлоқсизлиги учун калтаклангани айтилаётган болакай.
Маълум бўлишича, МТТ мудираси ҳаракатлари устидан аввал ҳам арз тушган, аммо шикоят қилувчиларни мудира турли йўллар билан енгиб келган. Энди ҳуқуқ-тартибот идоралрининг муносабатидан сўнг мудирага чора кўрилади.
