Куни кеча Токио-2020 ёзги Олимпия ўйинларида иштирок этган Ўзбекистон делегацияси Тошкентга етиб келгани ҳақида ёзган эдик.
Олий Мажлис Сенати Раиси Танзила Норбоева спортчиларни Олимпиядада эришган ютуқлари билан табриклади:
Ҳурматли олимпиада иштирокчилари!
Мен барча спортчиларни, мураббийларни, Токиодаги ХХХII ёзги Олимпия ўйинларида ҳамюртларимизни муносиб ўйин кўрсатишга ҳаракат қилган барчаларни ушбу ғалабалар билан табриклайман!
Умумжамоа ҳисобида Ўзбекистон 3 та олтин ва 2 та бронза медалини қўлга киритиб, Марказий Осиё минтақаси давлатлари орасида пешқадам, шунингдек, туркийзабон ва ислом давлатлари орасида етакчи ўринни эгаллади. Биз МДҲ давлатлари орасида муносиб иккинчи ўринни эгаллаб, Осиё мамлакатлари орасида ҳам бешинчи ўринни эгалладик. 2020 йилги Олимпия ўйинларида иштирок этган давлатлар орасида 32 - ўринни эгаллашга муваффақ бўлдик. Бу улкан натижа!
Олимпиадачиларимизнинг исмлари, уларнинг ғалабалари ва рекордлари жаҳон спорти йилномасига олтин ҳарфлар билан ёзилган. Таэквондочи Улуғбек Рашитов, оғир атлетикачи Акбар Жўраев ва боксчи Баҳодир Жалоловнинг узоқ кутилган олтин медалларни қўлга киритган ютуқларини алоҳида қайд этмоқчиман. Дзюдочи Давлат Бобонов ва курашчи Бекзод Абдураҳмонов жамоани бронза медали билан тўлдиришди.
Айниқса, қизларимизнинг ҳам рекорд натижаларни қайд этганлиги мени жуда хурсанд қилди. Муаттар Набиева бутун дунё ва Ўзбекистон тарихига биринчи оғир атлетикачи аёл сифатида Олимпия рекордини ўрнатди ва Олимпия ўйинларида кучли тўртликка кирди.
Гимнастикачи Оксана Чусовитина саккизинчи олимпиадасида қатнашиб, ўз рекордини янгилади. Велосипедчи Олга Забелинскаяни ҳам алоҳида таъкидлаш лозим, у Ўзбекистон велоспорти тарихида Олимпия ўйинларида мамлакат шарафини ҳимоя қилган биринчи аёл бўлди. Натижада у кучли ўнликка кириб Осиё мамлакатлари вакиллари орасида биринчи бўлди.
Бу спортчиларга қараб, бугун ҳар бирингиз ўзингизга ишониб, ўз олдингизга аниқ мақсад қўйиб, унга эришиш учун ишонч ҳосил қилиш имкониятига эга эканлигингизни тушуниш мумкин!
Ҳурматли олимпиячилар! Бугун сиз ҳаммамиз фахрланадиган ҳақиқий қаҳрамонларсиз. Сизларга сиҳат-саломатлик, куч-қувват ва барча ҳаракатларингизда максимал натижаларга эришишингизни тилайман!
Биз эса ҳар доим сизни турли арена ва спорт майдонларидан олқишлаб, қўллаб-қувватлаймиз!
