Австралиянинг Квинсленд ва Жанубий Уэльс штатларида кузатилаётган кучли ўрмон ёнғинлари сабаб ҳозирда одамлар ўз уй-жойларни ташлаб чиқишга мажбур бўлмоқда. Бу ҳақда Ntdtv.ru нашри хабар берди.
Ҳозирга қадар 140 та аланга ўчоғи рўйхатга олинган бўлиб, уларнинг аксарияти Квинсленд штатида жойлашган. Ёнғин 80 га яқин турар жой биноларига зарар етказган. Ҳудудда эсаётган кучли шамол алангани тез орада катта ҳудудларга тарқалишига сабаб бўлмоқда. Айни дамда минглаб гектар ҳудуд ёниб кул бўлган.
Жанубий ярим шарда ҳозир баҳор фасли, йилнинг бу даврида Австралияда одатда ёнғинлар тез-тез рўй беради. Бироқ бу сафар улар одатдагига қараганда, анча барвақт бошланди. Маҳаллий полиция ёнғинларнинг келиб чиқиши юзасидан тергов-суриштирув ишларини олиб бормоқда.
